Իջևանի 38/22 ընտրատեղամասում հաշվարկը սկսվեց՝ չնայած ընտրողների և կտրոնների միջև տարբերությանը․ ՏԵՍԱՆՅՈւԹ

Չնայած ընտրողների թվի և կտրոնների միջև անհամապատասխանությանը՝ Իջևանի 38/22 ընտրատեղամասում հաշվարկը սկսվել է։ Հանձնաժողովի նախագահ Լիլիթ Սարիբեկյանը պնդեց, որ խնդիր չկա: Factor TV-ի հարցին, թե որքան է ընտրողների և կտրոնների թվերի տարբերությունը, հանձնաժողովի անդամներից մեկն ասաց, որ այն ընդամենը մեկն է, սակայն հանձնաժողովի մյուս անդամները ընթացքում ավելի մեծ տարբերություն էին նշում։ Հանձնաժողովի անդամներից մեկն էլ պնդեց, թե հնարավոր է՝ կտրոնը ծրարի մեջ դրած լինեն:

Ժամը 20:00-ին սահմանված կարգով փակվել են 38/22 ընտրատեղամասի դռները: Այդ պահի դրությամբ սենյակում քվեարկող չի եղել:

Հիշեցնենք, որ Իջևանում ՏԻՄ ընտրություններին մասնակցում է երկու քաղաքական ուժ։ Իշխող «Քաղաքացիական պայմանագիր» կուսակցության ցուցակը գլխավորում է գործող համայնքապետ Արթուր Ճաղարյանը, իսկ «Ինքնիշխան Հայաստան» կուսակցության ցուցակը՝ Լևոն Վարդապետյանը։

Հիշեցնենք, որ այսօր Հայաստանի 21 համայնքում անցկացվում են ՏԻՄ ընտրություններ։ Դրանցից 19-ում ընտրություններն անցկացվում են համամասնական, իսկ Ֆիոլետովո և Շամիրամ համայնքներում՝ մեծամասնական ընտրակարգով։

Իջևանում ընտրողների ցուցակում ընդգրկված է 29 760 քաղաքացի։ Հունիսի 7-ի խորհրդարանական ընտրությունների համեմատ նրանց թիվը նվազել է 5342-ով կամ 15.2%-ով։ Ընտրողների թվի նվազման պատճառներից մեկը Ընտրական օրենսգրքի նոր պահանջն է․ ՏԻՄ ընտրություններին քվեարկելու համար ՀՀ քաղաքացին պետք է քվեարկության օրվան նախորդող 730 օրերի ընթացքում առնվազն 366 օր փաստացի գտնված լինի Հայաստանում։

Մանրամասները՝ տեսանյութում:

Անի Թամրազյան