13.10.2026 | 18:10
Զինծառայող է վիրավորվել //Կաշառքի գործով ձերբակալություններ, այդ թվում՝ Գյումրիի երաժշտական քոլեջում․ ԼՈՒՐԵՐ
ԵՄ-ն ռուսական նավթի դեմ պատժամիջոցների նոր փաթեթ է պատրաստում
Քաղաքականություն
13.10.2026 | 15:55
Եվրոպական հանձնաժողովը սկսել է Ռուսաստանի դեմ պատժամիջոցների 23-րդ փաթեթի մշակումը, հայտնում է Politico-ն։ Ենթադրվում է, որ այն ուղղված կլինի ռուսական նավթի վաճառքից ստացվող եկամուտների հետագա կրճատմանը։ Ռուսաստանի էներգակիրների նկատմամբ լրացուցիչ սահմանափակումներ սահմանելու կոչով հոկտեմբերի 15-ին նախատեսում են հանդես գալ նաև ԵՄ անդամ երկրների գագաթնաժողովի մասնակիցները, գրում է Meduza-ն։
Politico-ի հետ զրույցում քննարկումների ընթացքին ծանոթ ուկրաինական աղբյուրները հայտնել են, որ պատժամիջոցների նոր փաթեթի նախագիծը նախատեսվում է ԵՄ անդամ երկրներին ներկայացնել մինչև 2026 թվականի վերջը։
Նշվում է, որ ռուսական նավթի վերաբերյալ պատժամիջոցների նոր փաթեթ մշակելու որոշումը ԵՄ-ում կայացվել է ԱՄՆ-ի և Ռուսաստանի նախագահներ Թրամփի և Պուտինի՝ դիզելային վառելիքի շուրջ ձեռք բերած պայմանավորվածության ֆոնին։
Հոկտեմբերի 9-ին ԱՄՆ նախագահ Դոնալդ Թրամփը հայտարարել էր, որ Ռուսաստանի նախագահի հետ պայմանավորվել է ռուսական դիզելային վառելիքն ամերիկյան և համաշխարհային շուկաներ մատակարարելու շուրջ։ Թրամփի այս քայլը քննադատել են եվրոպացի բազմաթիվ քաղաքական գործիչներ՝ հայտարարելով, որ Ռուսաստանի նկատմամբ ճնշումը պետք է ուժեղացնել, այլ ոչ թե թուլացնել։
Հոկտեմբերի 12-ին ԵՄ-ն հավանություն էր տվել Ռուսաստանի դեմ պատժամիջոցների 22-րդ փաթեթին, որը ներառում է պատժամիջոցների ցանկի միանվագ ընդլայնման ամենամեծ ծավալը․ ցանկում ընդգրկվել է շուրջ 1,6 հազար ֆիզիկական և իրավաբանական անձ։
ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասը հայտարարել է, որ պատժամիջոցների ցանկն ընդլայնվել է, այդ թվում՝ բալիստիկ հրթիռների արտադրության մեջ ներգրավված անձանց հաշվին։
Թարգմանությունը՝ Էմմա Չոբանյանի
