03.10.2026 | 19:52
Վահագն Խաչատուրյանը հեռախոսազրույց է ունեցել Լիբանանի Հանրապետության նախագահ Ժոզեֆ Աունի հետ
Կադիրովը Ռուսաստանում ստացել է բարձրագույն զինվորական կոչումը, ոսկեգույն ուսադիրներ և կարմիր բերետ. ТАСС
Քաղաքականություն
03.10.2026 | 19:01
Ռուսաստանի Ազգային գվարդիայի դաշնային ծառայության (Ռոսգվարդիա) տնօրեն Վիկտոր Զոլոտովը Չեչնիայի ղեկավար Ռամզան Կադիրովին հանձնել է բանակի գեներալի ուսադիրներ և կարմիր բերետ, հայտնում է ТАСС-ը։
Զոլոտովը հայտնել է, որ Կադիրովին զինվորական կոչման բարձրացումը կատարել է Ռուսաստանի նախագահ Վլադիմիր Պուտինը։ Զոլոտովին հանձնարարվել է Կադիրովին փոխանցել Պուտինի հրամանագիրը և նրան հանձնել բանակի գեներալի ոսկեգույն ուսադիրները։
«Բայց սա դեռ ամենը չէ։ Երեք օր առաջ մենք նշեցինք գերատեսչության հատուկ նշանակության ուժերի ստեղծման հերթական տարեդարձը, որտեղ ձևավորվել է կարմիր բերետ հանձնելու ավանդույթը։ Եվ ի նշան երախտագիտության՝ որոշվեց բանակի գեներալ Կադիրովին հանձնել այս կարևոր խորհրդանիշը»,- հավելել է Զոլոտովը։
Կադիրովը նախկինում ուներ գեներալ-գնդապետի կոչում, որը ստացել էր 2022 թվականին։ Բանակի գեներալի կոչումը փաստացի Ռուսաստանի բանակում ամենաբարձր զինվորական կոչումն է։ Դրանից բարձր է միայն մարշալի կոչումը, որը 1997 թվականից ի վեր որևէ մեկին չի շնորհվել։
Կարմիր բերետը համարվում է Ռոսգվարդիայի հատուկ նշանակության ստորաբաժանումներում և որոշ այլ ուժային ծառայություններում բարձրագույն տարբերանշաններից մեկը։ Այն ստանալու համար անհրաժեշտ է անցնել մի շարք փորձություններ, որոնք երբեմն ավարտվում են մասնակիցների մահվամբ։
Հայտնի չէ՝ Ռամզան Կադիրովը մասնակցել է արդյոք այդ փորձություններին։ Միևնույն ժամանակ, նա նախկինում ևս կրել է կարմիր բերետ։
