29.09.2026 | 14:32
ՌԴ ԱԽ-ն մեկնաբանել է Հայաստանի մասնակցությունը Միջազգային քրեական դատարանին
COP 17-ը հնարավորություն կտա գենդերային հավասարության ակտիվիստների ցանցի մաս դառնալ․ ՏԵՍԱՆՅՈՒԹ
Հասարակություն
29.09.2026 | 13:20
ՄԱԿ-ի Կենսաբանական բազմազանության կոնվենցիայի կողմերի 17-րդ համաժողովի՝ COP 17-ի նախագահությունը Հայաստանի համար եզակի հնարավորություն է ինտեգրվելու կանանց և գենդերային հավասարության պաշտպանությամբ զբաղվող միջազգային հզոր ցանցերին և հստակեցնելու երկրի դերն ու առաջնահերթությունները գլոբալ օրակարգում։ Այս մասին «Գենդերային հավասարության, կենսաբազմազանության և COP 17-ի վերաբերյալ ազգային երկխոսություն» թեմայով քննարկման ընթացքում հայտարարեց ՀՀ Արտաքին գործերի և միջազգային առևտրի նախարարության Մարդու իրավունքների հարցերով միջազգային համագործակցության բաժնի պետ Զոյա Ստեփանյանը։
Դիվանագետի խոսքով՝ COP 17-ի նախագահությունն ու գագաթնաժողովի անցկացումը Հայաստանի բազմակողմ դիվանագիտության կարևորագույն առաջնահերթություններից են, որոնք կոչված են միջազգային հանրությանը ցույց տալու Հայաստանի դրական ներդրումը կայուն զարգացման օրակարգում։
Անդրադառնալով բանակցային գործընթացին՝ ԱԳՄԱ ներկայացուցիչը նշեց, որ Հայաստանը հանդես է գալու որպես չեզոք միջնորդ, որի գլխավոր նպատակն է լինելու ապահովել ներառական միջավայր և կողմերի միջև հասնել կոնսենսուսի՝ հավակնոտ, բայց միաժամանակ իրատեսական ու գործուն նպատակներ ամրագրելու համար։
Զոյա Ստեփանյանն ընդգծեց, որ միջազգային հարթակներում առկա լարվածության և որոշակի հետընթացի պայմաններում Հայաստանը շարունակում է հավատարիմ մնալ մարդու իրավունքների վրա հիմնված սկզբունքային դիրքորոշմանը. «Մենք, լինելով փոքր երկիր և գործելով բարդ տարածաշրջանային ու գլոբալ միջավայրում, մշտապես որդեգրել ենք առավել իրավունքահեն մոտեցումներ և սկզբունքային կեցվածք պահպանել կանանց իրավունքների պաշտպանության հարցում։ Նույն հանձնառությամբ առաջնորդվելու ենք նաև COP 17-ի նախագահության շրջանակներում, որտեղ կանանց և աղջիկների իրավունքներն ու գենդերային հավասարությունը խաչվում են բնապահպանական գրեթե բոլոր խնդիրների հետ»։
Մանրամասները՝ տեսանյութում։
Անի Թամրազյան
