Մի աղջիկ գրել է՝ ուզում է հաջորդ դաշնակցականներից լինել Քրիստինե Վարդանյանից հետո, ապրեք Արման Եղոյան․ ՏԵՍԱՆՅՈՒԹ

Ազգային ժողովում իր ելույթի ընթացքում «Հայաստան» խմբակցության պատգամավոր Քրիստինե Վարդանյանն անդրադարձել է իշխանական պատգամավորների կողմից ՀՅԴ-ի հասցեին հնչող քննադատություններին և հեգնանքին՝ ընդգծելով, որ դրանք հակառակ ազդեցությունն են ունենում հանրության շրջանում։

Պտգամավորն ԱԺ ամբիոնից ընթերցել է մի քաղաքացու նամակ, որն, ըստ նրա, նույն օրն էր ստացվել Դաշնակցության պաշտոնական էջին։

«Բարև ձեզ, երիտասարդ աղջիկ եմ․ այս պահին ծավալվող դաշնակցական քաղաքական դպրոց ունե՞ք, ես ուզում եմ հաջորդ դաշնակցականներից լինել Քրիստինե Վարդանյանից հետո»,- մեջբերել է Վարդանյանը։

Այնուհետև Վարդանյանը, դիմելով ՔՊ-ական պատգամավոր Արման Եղոյանին, ասել է. «Ապրե՛ք, Արման Եղոյան, շնորհակալություն»։

Հիշեցնենք, որ ՔՊ-ական Արման Եղոյանը, անդրադառնալով երդման տեքստի «Հանուն Հայաստանի հարատևության, անկախության և ինքնիշխանության» դրույթին,  քննադատությամբ դիմել էր ընդդիմադիրներին՝ հայտարարելով, թե այդ նպատակների համար անհրաժեշտ է «դաշնակցականությունն արմատախիլ անել հայ քաղաքական մտքից»։

«Քրիստինե Վարդանյանը պետք է լինի վերջին դաշնակցականը, Քրիստինե Վարդանյանը պետք է լինի հայ քաղաքական կյանքի վերջին դաշնակցականը։ Սա է ֆունդամենտալ նախապայմանը Հայաստանի Հանրապետության հարատևման, անկախության և ինքնիշխանության համար»,- ամբիոնից մատնացույց անելով ընդդիմադիր պատգամավորին՝ բղավել էր Եղոյանը։ ՔՊ-ական պատգամավորը Դաշնակցությանը որակեց «աղետաբեր և կոնֆլիկտածին» ուժ։

Մանրամասները՝ տեսանյութում։
Անի Թամրազյան