ՀՀՇ-ի ծիլերից ծնվեց մեկը, որը իր խոսույթով չի տարբերվում թուրքերից․ Խաչատրյանը՝ Եղոյանին․ ՏԵՍԱՆՅՈՒԹ

Ազգային ժողովում «Կառավարության կառուցվածքի և գործունեության մասին» օրենքի փոփոխությունների քննարկման ժամանակ ծավալված բուռն վիճաբանությանը կոշտ ելույթով արձագանքեց ընդդիմադիր «Հայաստան» խմբակցության պատգամավոր Արթուր Խաչատրյանը՝ պատասխանելով ՔՊ-ական պատգամավոր Արման Եղոյանի հայտարարություններին։

Ավելի վաղ Արման Եղոյանն ամբիոնից մատնացույց էր արել պատգամավոր Քրիստինե Վարդանյանին՝ հայտարարելով, թե նա պետք է լինի «հայ քաղաքական կյանքի վերջին դաշնակցականը», և կոչ էր արել դաշնակցականությունն արմատախիլ անել հայ քաղաքական մտքից։

Արթուր Խաչատրյանն իր ելույթում ընդգծեց, որ Եղոյանի մեջ երբեք էլ դաշնակցականություն չի եղել, և նա իր էությամբ «ՀՀՇ-ական արմատներից սերված ՔՊ-ական է»։ 

Պատգամավորը հիշեցրեց Հայաստանի անկախացման տարիներին առկա երկու գաղափարական մոտեցումները՝ նշելով, որ ի տարբերություն ՀՀՇ-ի «զրոյական կետից» սկսելու քաղաքականությանը, Դաշնակցությունը մշտապես առաջնորդվել է ազգային պետականության ամուր հիմքերով։

«Եվ ահա, ՀՀՇ-ի ծիլերից ծնվեց մեկը, ով ոչնչով իր խոսույթով չի տարբերվում թուրքերից։ Ոնց որ թուրքերն էին ասում՝ «պետք է մնա մի հայ, այն էլ՝ թանգարանում», այնպես էլ դուք էիք ասում՝ «պետք է մնա մի հոգի, այն էլ՝ վերջինը»։ Կանգնե՛ք հայելու առաջ և փորձե՛ք Ձեր ասածների մեջ բանականություն գտնել․ թուրքերի հետ նմանությունը՝ հարյուրից հարյուր է»,- ամբիոնից հայտարարեց Խաչատրյանը։

Ելույթից հետո նիստը նախագահող ԱԺ փոխխոսնակ Ռուբեն Ռուբինյանը փորձեց մեղմել իրավիճակը՝ նշելով, թե Արման Եղոյանը նկատի չի ունեցել դաշնակցականների ֆիզիկական վերացումը, այլ խոսել է քաղաքական գաղափարախոսության մասին, որն իշխող մեծամասնությունը համարում է քաղաքական հակառակորդ և Հայաստանի համար վնասակար։

Մանրամասները՝ տեսանյութում։

Անի Թամրազյան