Էդ ե՞րբ ա 102-րդ ռազմաբազան մեզ տեր կանգնել, որ դուրս գալուց էլ անտեր ենք մնալու. Արմեն Խաչատրյան․ ՏԵՍԱՆՅՈՒԹ

Գյումրիում տեղակայված ռուսական 102-րդ ռազմաբազայի ներկայությունը Հայաստանի Հանրապետության համար առաջնահերթություն չէ․ եթե այն պետք է ռուսական կողմին, ապա պետք է քննարկվի հայկական կողմի հետ։ Այս մասին Ազգային ժողովում լրագրողների հետ զրույցում հայտարարեց «Քաղաքացիական պայմանագիր» խմբակցության պատգամավոր, Պաշտպանության և անվտանգության հարցերի մշտական հանձնաժողովի անդամ Արմեն Խաչատրյանը։

​Պատասխանելով հարցին, թե արդյոք անհրաժեշտ է ռազմաբազան դուրս բերել Հայաստանից, պատգամավորը նշեց, որ այդ հարցի պատասխանը հստակ երևում է Ռուսաստանի նախագահի հետ ՀՀ վարչապետի հանդիպման արդյունքներից։

​«Մեզ պետք չէ, բայց եթե ռուսական կողմին դա պետք է, դա քննարկման առարկա է, ոչ մի խնդիր»,- ընդգծեց Խաչատրյանը։

Հիշեցնենք` Բիշքեկում կայացած Փաշինյան-Պուտին հանդիպումից հետո ՌԴ նախագահը հայտարարեց, որ կարող են ռազմաբազան հանել, եթե ՀՀ-ն նման ցանկություն ունենա։

​Նախորդ շաբաթ էլ «Ուժեղ Հայաստան» կուսակցության առաջնորդ Սամվել Կարապետյանը դատարանի բակում հայտարարել էր, որ, եթե 102-րդ բազան Հայաստանից հանվի, ՀՀ-ն անտեր կմնա։

«Էդ ե՞րբ է 102-րդ բազան մեր տիրություն արել, որ հիմա էլ անտեր մնանք։ Մեզ համար միևնույնն է՝ այդ ռազմաբազան կլինի, թե՝ չէ։ Եթե իրենք ուզում են, որ մնա, ուրեմն պետք է քննարկեն հայկական կողմի հետ, եթե չեն ուզում մնա, խնդիր չկա, թող չմնա»,- Կարապետյանին ի պատասխան նշեց Արմեն Խաչատրյանը։

​Դիտարկմանը, թե առաջիկայում հնարավո՞ր է ռազմաբազայի պահպանման հետ կապված ծախսերի կամ ֆինանսական պայմանների փոփոխություն կամ թանկացում տեղի ունենա, Արմեն Խաչատրյանը նշեց, որ չի կարող հստակ ասել, սակայն «որևէ բան բացառել պետք չէ»։

Մանրամասները` տեսանյութում։

Նարեկ Կիրակոսյան