14.09.2026 | 13:38
Հայաստանում այսօր բռնաբարվում է գույքային իրավունքը․ Լիլիթ Գալստյան․ ՏԵՍԱՆՅՈՒԹ
ԱԺ-ն չի ընդունի՝ հնով կերդվենք․ Գալյանը՝ Կառավարության անդամի երդման տեքստի մասին․ ՏԵՍԱՆՅՈՒԹ
Քաղաքականություն
14.09.2026 | 11:55
Ազգային ժողովի նիստում Կառավարության անդամի երդման տեքստի փոփոխության նախագծի քննարկման ժամանակ հարցուպատասխան ծավալվեց «Ուժեղ Հայաստան» խմբակցության քարտուղար Տիգրան Աբրահամյանի և Արդարադատության նախարար Սրբուհի Գալյանի միջև։
Տիգրան Աբրահամյանը հետաքրքրվեց, թե ինչու օգոստոսի 3-ից մինչև օրս Կառավարությունը դեռևս երդում չի տվել։
«Դուք բերել եք օրենքի նախագիծը՝ վստահություն ունենալով, որ այն կընդունվի, և նոր տեքստով կերդվեք։ Իսկ եթե Ազգային ժողովը չընդունի՞ օրենքը, դուք շարունակելո՞ւ եք երդում չտված պաշտոնավարել»,- հարցրեց ընդդիմադիր պատգամավորը։
Անդրադառնալով երդման ընթացակարգին՝ նախարարը պարզաբանեց․ «Ազգային ժողովը չի որոշի ընդունել օրենքի նախագիծը, շատ լավ, հնով կերդվենք։ Հին երդումը դեռ ուժի մեջ է, քանի դեռ չի փոփոխվել։ Իսկ թե ինչո՞ւ ենք փոփոխում՝ որովհետև նոր առաջարկվող տեքստը ավելի քան համահունչ է այն գաղափարախոսությանը, որը հիմա ակտուալ է, և նաև համապատասխանում է Կառավարության ծրագրին»։
Պատգամավորի հստակեցնող հարցին, թե արդյոք նախկին տեքստում կար որևէ ձևակերպում, որն անընդունելի էր գործադիրի համար, Արդարադատության նախարարը նշեց, որ նախկինում ինքն այդ տեքստով արդեն երդվել է և որևէ խնդիր չի տեսնում, սակայն նպատակահարմար են համարել երդման բովանդակությունը համապատասխանեցնել ներկայիս առաջնահերթություններին։
«Ինչո՞ւ չունենալ երդման այնպիսի տեքստ, որը կհամապատասխանի «Իրական Հայաստանի» գաղափարախոսությանը, որն արտացոլում է մեր իրականությունը, և ինչո՞ւ չներառել այնպիսի առանցքային հասկացություններ, ինչպիսիք են պետության հարատևությունը և ապագա սերունդների առջև պատասխանատվությունը։ Ամենայն հարգանքով նախորդ կարգավորման նկատմամբ՝ ես ցանկանում եմ գործել ապագա սերունդների առջև ամենայն պատասխանատվությամբ և մեր պետության հարատևության տեսլականով»,- ընդգծեց նախարարը։
Մանրամասները՝ տեսանյութում։
Անի Թամրազյան
