11.09.2026 | 22:15
Նոր կենսաչափական անձնագրերով սահմանային ստուգումը կտևի վայրկյաններ․ ՆԳ նախարար
Թյուրքական երկրները Եվրոպոլին համարժեք կառույց են ստեղծում՝ TURKPOL-ը
Քաղաքականություն
11.09.2026 | 21:23
Թյուրքական պետություններն աշխատում են հանցավորության դեմ պայքարի ոլորտում համագործակցության նոր մեխանիզմ ստեղծելու ուղղությամբ, որը հեռանկարում կարող է դառնալ Եվրոպոլի համարժեքը։ Այս մասին Աստանայում Թյուրքական պետությունների կազմակերպության անդամ երկրների ներքին գործերի նախարարների հանդիպման ժամանակ հայտարարել է Թուրքիայի ներքին գործերի նախարար Մուստաֆա Չիֆթչին, գրում է TRT-ի ռուսական ծառայությունը։
Չիֆթչիի խոսքով՝ առաջարկվում է ստեղծել «Հանցագործության դեմ պայքարի խորհուրդ», որը կդառնա որպես իրավապահ մարմինների համագործակցության ընդհանուր հարթակ։ Մեխանիզմը, մասնավորապես, պետք է նպաստի հետախուզվող անձանց համատեղ բացահայտմանը։ Այն ստեղծելու համաձայնագրի շուրջ բանակցություններն արդեն սկսվել են, և նախատեսվում է, որ փաստաթուղթը կստորագրվի քննարկումների ավարտից հետո։
Թուրքիայի նախարարը հայտարարել է, որ հետագայում կառույցը կարող է ստանալ ավելի լայն լիազորություններ և վերածվել TURKPOL-ի՝ Թյուրքական պետությունների իրավապահ մարմինների համագործակցության գործակալության։Որպես օրինակ նա բերել է Եվրոպոլը և ASEANAPOL-ը՝ համապատասխանաբար Եվրոպայի և Հարավարևելյան Ասիայի երկրների իրավապահ մարմինների համագործակցության մեխանիզմները։
Հաղորդվում է, որ Աստանայում կայացած հանդիպմանը մասնակցել են Թուրքիայի, Ադրբեջանի, Ղազախստանի, Ղրղզստանի և Ուզբեկստանի ներքին գործերի նախարարները։ Ղազախստանի նախագահ Կասիմ-Ժոմարտ Տոկաևը հայտարարել է, որ միջազգային անկայուն իրավիճակի պայմաններում թյուրքական երկրների ուժային կառույցների միջև համագործակցությունը առանձնահատուկ նշանակություն է ձեռք բերում։
Նա նաև նշել է, որ Ղազախստանում իրականացվող լայնածավալ վերափոխումները կներառեն բոլոր ոլորտները, այդ թվում՝ իրավապահ գործունեությունը։
Լրատվամիջոցը նշում է, թե միասնական իրավապահ կառույցի ստեղծումը կարող է դառնալ Թյուրքական պետությունների կազմակերպության ինստիտուցիոնալ ինտեգրման նոր փուլ։ Հանցավորության դեմ պայքարից բացի, կազմակերպության անդամ երկրներն արդեն զարգացնում են համագործակցությունը իրավապահների պատրաստման, անդրազգային հանցավորության դեմ պայքարի և միգրացիայի կառավարման ոլորտներում։
Թարգմանությունը՝ Էմմա Չոբանյանի
