01.11.2026 | 21:56
Լրագրողներն այցելել են բանակային դիրք ու ամրացված շրջան, հանդիպել Սուրեն Պապիկյանի հետ
40 կրպակ քանդել ենք. ինքնակամ շինություններ են. Աջափնյակի թաղապետ. ՏԵՍԱՆՅՈՒԹ
Հասարակություն
10.09.2026 | 14:21
Երևանի Աջափնյակ վարչական շրջանի Շինարարների փողոցում շարունակվում են ապօրինի և ինքնակամ կառույցների ապամոնտաժման աշխատանքները։ Այս մասին Factor TV-ի ուղիղ եթերում հայտնել է վարչական շրջանի ղեկավար Սերոբ Սարգսյանը։
Նրա խոսքով՝ գործընթացն իրականացվում է փուլերով։ Առաջին փուլով Առաքելյան փողոցից մինչև Էստոնական փողոց ընկած հատվածում ապամոնտաժվել էր 13 ինքնակամ կառույց, իսկ երկրորդ փուլով աշխատանքներն ընդգրկում են մինչև Քըրք Քըրքորյան փողոց։ Ընդհանուր առմամբ, ըստ թաղապետի, փողոցի ամբողջ երկայնքով արդեն քանդվել է շուրջ 40 ինքնակամ շինություն և մի քանի ծածկ (շվաքարան)։
Սերոբ Սարգսյանը նշել է, որ ապամոնտաժված շինությունները որևէ կարգավիճակ կամ վարձակալության պայմանագիր չեն ունեցել և կառուցված են եղել ընդհանուր օգտագործման, կանաչապատման գոտիներում կամ մայթերին։ Չեն քանդվել միայն այն շինությունները, որոնք ունեն գրանցված սեփականության իրավունք։
«Տնտեսվարողներին նախապես բանավոր զգուշացրել ենք, ապա տրամադրել համապատասխան որոշումները։ Թեև ոչ ոք ուրախ չէ իր շինության ապամոնտաժման համար, սակայն որևէ կոնֆլիկտ չի եղել․ շատերը նույնիսկ մեր աշխատանքներից 3-4 օր առաջ իրենց նախաձեռնությամբ էին սկսել ապամոնտաժումը»,- պարզաբանել է թաղապետը։
Վարչական շրջանի ղեկավարի փոխանցմամբ՝ քաղաքացիներից բազմաթիվ բողոքներ ու դիմումներ են ստացվել՝ հանրային տարածքները վերադարձնելու պահանջով։ Ապամոնտաժման և տարածքի մաքրման աշխատանքների ավարտից հետո այդ հատվածներում նախատեսվում է իրականացնել բարեկարգում, կանաչապատում, ծառատունկ, ինչպես նաև վերականգնել հետիոտների համար նախատեսված մայթերը։
Մանրամասները՝ տեսանյութում։
Արփի Հակոբյան
