Ունենք ոչ թե ավտոբուսների քանակի, այլ փողոցների ծանրաբեռնվածության խնդիր․ Ավինյան․ ՏԵՍԱՆՅՈւԹ

Երևանում երթևեկության կազմակերպման նոր լուծումներ են մշակվում։ Քաղաքապետարանի գործակարգավարական նիստում «Երևանի երթևեկության կառավարման կենտրոն»-ից հայտնեցին, որ «Փարկինգ Սիթի Սերվիս» ՓԲԸ-ին պատկանող տեսախցիկների ցանցի միջոցով Երևանի մի շարք փողոցներում տվյալներ են հավաքագրվում տրանսպորտային հոսքերի վերաբերյալ։

Հավաքագրված տվյալների և նախնական արդյունքների վերաբերյալ առանձին զեկույց կներկայացվի աշխատանքների ավարտից հետո։

Զուգահեռաբար ուսումնասիրվում են Երևանի փողոցներն ու խաչմերուկները՝ երթևեկության կազմակերպումը բարելավելու նպատակով։

«Մի շարք հատվածներում արդեն վերակազմակերպվել կամ վերացվել են երթևեկությանը խոչընդոտող գրպանիկները, վերանայվել է կայանման կազմակերպումը, իսկ երթևեկելի հատվածներում տեղադրված աղբամանները տեղափոխվել են առանձնացված վայրեր։ Վերանայվում են նաև խաչմերուկներին հարակից հատվածներում կայանման սահմանները՝ տեսանելիությունն ապահովելու և երթևեկությանը խոչընդոտող գործոնները նվազեցնելու համար»,- ասաց կենտրոնի տնօրեն Էդուարդ Այվազյանը։

Քաղաքապետ Տիգրան Ավինյանը, անդրադառնալով զեկույցին, նշեց, որ Երևանի երթևեկության կառավարման կենտրոնից ակնկալում է ոչ միայն իրականացվող աշխատանքների, այլև դրանց արդյունքների հստակ, փաստահեն և տվյալահեն ներկայացում։

Միաժամանակ նա առանձնացրեց քաղաքի երթևեկության հիմնական խնդիրներից մի քանիսը՝ մարդատար ավտոմեքենաների թվի աճը, ապօրինի կայանումը և հանրային տրանսպորտի կանգառների մոտ մեքենաների առկայությունը։

Քաղաքապետն ընգծեց, որ հանրային տրանսպորտի համար առանձնացված գծերի ստեղծումն առաջնահերթություն է․ «Ավտոբուսային գծերը, ավտոբուսային առանձնացված գծերը այլընտրանք չունեն»։

Ավինյանի խոսքով՝ մի շարք դեպքերում խնդիրը ոչ թե ավտոբուսների քանակն է, այլ փողոցների ընդհանուր ծանրաբեռնվածությունը։

«Դա բերում է կանգառներում մարդկանց ծանրաբեռնվածության և հանրային տրանսպորտի ոչ պատշաճ սպասարկմանը։ Եվ, հետևապես, մեր հանրային տրանսպորտի երթևեկելի գոտիները պետք է լինեն մեզ համար առաջնահերթ»,- ասաց քաղաքապետը։

Նա հանձնարարեց այս ուղղություններով աշխատանքները ներկայացնել շաբաթական ռեժիմով՝ ընդգծելով, որ առկա տվյալները պետք է հասանելի լինեն նաև երևանցիներին։

Մանրամասները՝ տեսանյութում։

Արփի Հակոբյան