Ստամբուլի Սիլիվրի շրջանի ափերի մոտ բախվել է թուրքական դրոշի ներքո նավարկող առևտրային երկու նավ։ Իշխանությունները կորցրել են կապը նավերից մեկի և դրա անձնակազմի 10 անդամների հետ։ Այս մասին չորեքշաբթի վաղ առավոտյան հայտարարել է Ստամբուլի նահանգապետի գրասենյակը․ գրում է Անադոլու գործալությունը։
Նշվում է, որ Թուրքիայի դրոշով «Alsu» առևտրային նավը, որը Կոջաելիից շարժվում էր Ալիաղա, տեղական ժամանակով ժամը 03:00-ի սահմաններում (Գրինվիչի ժամանակով՝ 00:00-ին) բախվել է Թուրքիայի դրոշով մեկ այլ առևտրային նավի՝ «Tugberk Imamoglu»-ի հետ, որը Իսքենդերունի նավահանգստից շարժվում էր դեպի Քարադենիզ Էրեգլի։ Բախումը տեղի է ունեցել Սիլիվրիից 18 ծովային մղոն հարավ։
Հայտարարության մեջ ասվում է, որ դեպքի վայր են ուղարկվել Ափամերձ անվտանգության գլխավոր վարչության և Ափամերձ պահպանության Մարմարայի և նեղուցների հրամանատարության նավեր, ինչպես նաև Ափամերձ պահպանության ուղղաթիռ։
Դեպքի վայր ժամանած խմբերի նախնական գնահատմամբ՝ «Alsu» նավի վրա տեսանելի վնասներ չեն հայտնաբերվել։
Սակայն իշխանությունները հայտնել են, որ չեն կարողացել կապ հաստատել «Tugberk Imamoglu» առևտրային նավի կամ դրա անձնակազմի 10 անդամների հետ։ Տարածքում շարունակվում են որոնողափրկարարական աշխատանքները։
Թարգմանությունը՝ Էմմա Չոբանյանի
