02.09.2026 | 11:42
Դատախազությունը պահանջում է անվավեր ճանաչել Աչաջուրի գյուղապետարանի և Մշակույթի տան գույքերի օտարման գործարքները
Կաթողիկոսի գործով դատավոր Վահագն Մելիքյանի վերաբերյալ քրեական և կարգապահական վարույթ կա
Հասարակություն
02.09.2026 | 10:25
Ամենայն հայոց կաթողիկոսի և 6 եպիսկոպոսների գործով դատավոր Վահագն Մելիքյանի վերաբերյալ քրեական և կարգապահական վարույթ է առկա։ Քրեական վարույթի քննությունը շարունակվում է, իսկ կարգապահական վարույթը ԲԴԽ-ում կասեցված է՝ մինչև քրեական վարույթի ավարտը։
Նշենք, որ թե՛ կարգապահական գործը, թե՛ քրեական վարույթը վերաբերում են հայտարարագրում կեղծ տվյալ ներկայացնելուն կամ հայտարարագրման ենթակա տվյալ թաքցնելուն։
2025-ի մայիսին ԲԴԽ-ն Կոռուպցիայի կանխարգելման հանձնաժողովից ստացել է միջնորդություն՝ Մելիքյանին կարգապահական պատասխանատվության ենթարկելու վերաբերյալ։ Ըստ կարգապահական գործի՝ դատավորը գրավադրել է հարևանի անվամբ գրանցված բնակարանը, որը, Կոռուպցիայի կանխարգելման հանձնաժողովի պնդմամբ, պատկանում է Մելիքյանին և վարել աղջկա անվամբ գրանցված, բայց կրկին իրեն պատկանող ավտոմեքենան։ Հանձնաժողովը դատավորի վերաբերյալ կարգապահական վարույթը ԲԴԽ ուղարկելուն զուգահեռ դիմել էր նաև Դատախազություն՝ քրեական վարույթ նախաձեռնելու հարցով։ Վարույթը նախաձեռնվել էր։ Այս հանգամանքով պայմանավորված՝ ԲԴԽ-ն մինչև քրեական վարույթի ավարտը կասեցրել էր կարգապահական գործի քննությունը։
Այս պահի դրությամբ՝ ԲԴԽ-ն դեռևս չի վերսկսել կարգապահական գործի քննությունը, ինչից կարող ենք եզրակացնել, որ Վահագն Մելիքյանի վերաբերյալ քրեական գործի քննությունը շարունակվում է։ Դատավորների վերաբերյալ քրեական վարույթի տվյալները գաղտնի են պահվում, սակայն ենթադրվում է, որ քրեական վարույթով Մելիքյանը չունի մեղադրյալի կարգավիճակ։ Դատավորներն անձեռնմխելի են, և լիազորությունների կապապցությամբ նրանց նկատմամբ քրեական հետապնդում հարուցելուց առաջ դատախազը պետք է ստանա ԲԴԽ-ի համաձայնությունը։ Դատախազը մինչև այս պահը ԲԴԽ-ին այս հարցով չի դիմել, ինչից կարելի է եզրահանգել, որ Մելիքյանը քրեական վարույթով մեղադրյալ չէ, սակայն նրա հայտարարագրի վերաբերյալ քրեական վարույթը շարունակվում է։
Նշենք, որ քրեական վարույթի առկայության մասին Factor TV-ն գրել էր 2025-ի մայիսին։ Դատավոր Վահագն Մելիքյանը մեզ հետ զրույցում հաստատել էր, որ գործն իր հայտարարագրին է առնչվում, բայց և հայտնել էր, քննության առարկա գույքն իրեն չի պատկանել։
Արաքս Մամուլյան
