Սրան պետք է վերջ դնել, կամ էլ բոլորը պետք է սկսեն թուրքերեն սովորել․ Քոչարյանը կալանավայրից դիտարկումներ է արել․ ՏԵՍԱՆՅՈՒԹ

ՀՀ երկրորդ նախագահ Ռոբերտ Քոչարյանի ծննդյան օրը հրավիրված մամուլի ասուլիսն սկսվեց թիմակիցների կողմից շնորհավորական խոսքերով ուղղված բանտում գտնվող Քոչարյանին։

Նախկին նախագահի գրասենյակի ղեկավար Բագրատ Միկոյանն ընթերցեց Քոչարյանի դիտարկումները՝ վերջին օրերի իրադարձությունների մասով։

«I. Փաշինյանի մոտ բնածին վախերի և բարդույթների հերթական մանիակալ սրացումն է, իսկ դատաիրավական համակարգը սպասարկում է նրա ֆոբիաները: Մենք կարող ենք կորցնել երկիրը, և կարծես թե, ժողովուրդը կորցրել է կոլեկտիվ ինքնապահպանման բնազդը:

II. Հերթական քրեական մեղադրանքն այնքան աբսուրդային է, որ դժվար է գնահատական տալ նորմատիվ բառապաշարի շրջանակներում: Բայց, այնուամենայնիվ, կփորձեմ անել դա՝ ամբողջությամբ վերցրած, ընդհանրացված խոսքերով. որպեսզի ներկայացվի այսքան ոչնչով չհիմնավորված մեղադրանք, անհրաժեշտ է կամ լիակատար բարոյական դեգրադացիա, կամ իրավական դեբիլիզմ, կամ Ադրբեջանի դատաիրավական համակարգին լիակատար ենթարկում: Դա նրանց մոտեցումն է, որ Արցախի բոլոր նախագահները պետք է լինեն բանտում:

III. Երկիրը ներքաշել են ծայրահեղ վտանգավոր արկածախնդրության մեջ՝ դնելով խոշոր տերությունների աշխարհաքաղաքական շահերի բախման կենտրոնում:

VI. Իշխանության նպատակն ակնհայտ է՝ պառակտել հասարակությունը, ստեղծել վախի, ատելության, անկարողության և դատապարտվածության մթնոլորտ: Սրանք անհրաժեշտ պայմաններ են Բաքվի բոլոր պահանջները կատարելու համար:

V. Փաշինյանը ոչ միայն հանձնում է հայկական հողերը, այլև կոտրում ազգի կոլեկտիվ կամքն ու հոգևոր արժեքները, որոնք ցանկացած պետականության հիմքն են կազմում: Սրան պետք է վերջ դնել, կամ էլ բոլորը պետք է սկսեն թուրքերեն սովորել»,- Ռոբերտ Քոչարյանի հայտարարության ընթերցումն ավարտեց Միկոյանը։

Նա նշեց նաև, որ սա արդեն Քոչարյանի չորրորդ կալանավորումն է։ Միկոյանի խոսքով՝ այն ունի բացառապես աշխարհաքաղաքական դրդապատճառներ և հանդիսանում է Բաքվից եկող ուղղակի պատվեր, որը ներկայիս իշխանությունները հնազանդորեն կատարում են։

Մանրամասները՝ տեսանյութում։

Ռոզա Վարդանյան