Սիրիայի նախագահը քրդական ուժերի նախկին հրամանատարին նշանակել է իր խորհրդական

Սիրիայի նախագահ Ահմեդ ալ-Շարաան քրդերի գլխավորած և ներկայում լուծարված զինյալ ​​ուժերի նախկին հրամանատարին իր խորհրդական է նշանակել, ինչն արտացոլում է քաղաքացիական պատերազմի երկու վաղեմի հակառակորդների մերձեցումը, գրում է Reuters-ը։

2024 թվականի վերջին ալ-Շարաայի գլխավորած ապստամբական կոալիցիայի կողմից նախկին նախագահ Բաշար ալ-Ասադի տապալումից հետո իսլամիստների գլխավորած Սիրիայի նոր իշխանությունները պնդում էին, որ Սիրիական դեմոկրատական ուժերի (SDF) կողմից կառավարվող տարածքը և հաստատությունները պետք է ինտեգրվեն պետությանը։ Ավելի քան մեկ տասնամյակ Մազլում Աբդին ղեկավարել է քրդերի գլխավորած Սիրիայի դեմոկրատական ուժերը, որոնք համագործակցում էին ԱՄՆ-ի հետ՝ «Իսլամական պետության» դեմ պայքարելու և երկրի պատերազմի ընթացքում Սիրիայի հյուսիսային ու արևելյան տարածքների զգալի մասը գրավելու նպատակով՝ ինքնավար գոտի ստեղծելու համար։

Ինտեգրման գործընթացը մեկ տարուց ավելի կանգ էր առել, մինչև Սիրիայի կառավարական ուժերի կողմից Աբդիի զինյալների դեմ հունվարյան կայծակնային հարձակումը ստեղծել էր «Սիրիայի դեմոկրատական ​​ուժերը» (SDF) Դամասկոսի իշխանությունների հետ միավորելու «ճանապարհային քարտեզ»։

Աբդին երեքշաբթի հայտարարել էր, որ SDF-ն պաշտոնապես լուծարվելու է՝ ողջունելով «խաղաղության և նոր Սիրիայի կառուցմանը մասնակցության» նոր փուլի սկիզբը։

Առայժմ պարզ չէ՝ արդյո՞ք նախագահի խորհրդարանի դերը զուտ արարողակարգային է լինելու։

SDF-ը պայքարել է ծայրահեղ պահպանողական խմբավորումների, այդ թվում՝ «Իսլամական պետության» և «Ալ-Քաիդայի» տեղական ճյուղի դեմ, որը ժամանակին ղեկավարում էր ալ-Շարաան, նախքան նա կխզեր կապերը կազմակերպության հետ։ SDF-ի ինտեգրման շրջանակում նրա զինյալները ներառվում են Սիրիայի Պաշտպանության նախարարության կազմում։ Նրանց թվում են նաև բարձրաստիճան ներկայացուցիչներ, որոնք քննադատաբար էին վերաբերվում Սիրիայի իշխող վարչակազմին։

Հունվարին տեղի ունեցած մարտերի ընթացքում քրդական ուժերի հրամանատարներից մեկը՝ Սիփան Համոն, առաջարկել էր Իսրայելին օդային հարվածներ հասցնել սիրիական զորքերին։ Մի քանի շաբաթ անց, ինտեգրման համաձայնագրի մասին հայտարարվելուց հետո, նա նշանակվել էր  պաշտպանության նախարարի տեղակալ։

Թուրքիան, որը Շարաայի մտերիմ դաշնակիցն է, ողջունել է  SDF-ի լուծարումը, որին երկար ժամանակ մեղադրում էր իր  կողմից օրենքից դուրս հայտարարված Քուրդիստանի աշխատավորական կուսակցության (PKK) զինյալ խմբավորման հետ կապերի մեջ։