Քաղաքականություն
06.08.2026 | 12:30Արդարադատության նախարար Սրբուհի Գալյանը լրագրողների հետ ճեպազրույցում հայտարարեց, որ նոր Սահմանադրության տեքստը դեռ քննարկումների փուլում է, իսկ հրապարակման ժամկետի վերաբերյալ վերջնական որոշում չկա։
Factor TV-ի հարցին՝ երբ կհրապարակվի տեքստը, Գալյանն արձագանքեց։
«Ի՞նչ տարբերություն, թե երբ պետք է հրապարակվի, եթե առանց հրապարակվելու դրա ընդունումը անհնար է։ Երբ էլ հրապարակվի, դրվելու է հանրային լայն քննարկման և շատ երկար ու մանրակրկիտ քննարկվելու է հանրության հետ»,- ասաց նա։
Հարցին՝ արդյոք իշխող մեծամասնությունը խնդիր ունի նոր Սահմանադրությունն Ազգային ժողովում ընդունելու համար անհրաժեշտ ձայներ ապահովելու հարցում, նախարարը պատասխանեց, որ իշխանության հանձնառությունը նախագիծը մշակելն ու հանրությանը ներկայացնելն է։
«Մենք խնդիր չունենք։ Մեր հանձնառությունն է մշակել Սահմանադրության նոր տեքստը և ներկայացնել հանրության դատին։ Հետո կչափենք հանրության ցանկությունները և կներկայացնենք Ազգային ժողով այնպես, որպեսզի Ազգային ժողովը հաստատի»,- ասաց նա։
Գալյանը նշեց, որ հնարավոր են նաև այլ ընթացակարգեր։
«Կան նաև մասնագիտական մոտեցումներ, որ ժողովրդավարությունը ենթադրում է ժողովրդի անկասելիությունն իր ցանկությունների ամրագրման համատեքստում, մասնավորապես՝ ստորագրությունների միջոցով։ Ես չեմ կարող հիմա գուշակություններ անել։ Ինձ համար լավագույն սցենարը կլինի այն, որ Սահմանադրության նոր տեքստը լինի այնպիսին, որ խորհրդարանը տա հավանություն։ Ես որևէ սցենար չեմ բացառում»,- ասաց նախարարը։
Հիշեցնենք՝ Սրբուհի Գալյանը տարեսկզբին հայտարարել էր, որ նոր Սահմանադրության տեքստը կհրապարակվի մարտին։ Սակայն մինչ օրս այն չի հրապարակվել։
Մանրամասները՝ տեսանյութում։
Արփի Հակոբյան
