Մանրամասներ Գյումրիում դաժան ծեծի հետևանքով կնոջ մահվան դեպքի մասին․ ինչո՞ւ է իրավապահ համակարգին խիստ զգուշացում տրվել

Գյումրիում փողոցի մաքրուհու սպանության մեջ կասկածվում է ռուս զինծառայող: Այս մասին փոխանցում են Գյումրիի մեր աղբյուրները:

Հիշեցնենք, որ դեկտեմբերի 2-ին Գյումրու Սլաբոդկա թաղամասում դաժան ծեծի է ենթարկվել 57-ամյա մի կին: Վերջինս Գյումրու բժշկական կենտրոնի ճանապարհին մահացել է: Նա որպես աշխատակից գրանցված է Գյումրու քաղաքապետարանի բնակկոմունալ բաժնում և իրականացնում է փողոցի մաքրման աշխատանքներ:

Մեր տեղեկությունների վերաբերյալ, որ կնոջ դաժան ծեծի մեջ մեղադրվում է ռուս զինծառայողը, դատախազության լրատվական ծառայությունից փոխանցեցին, որ կա մի քանի վարկած, սակայն, նախաքննական գաղտնիք են եւ հրապարակման ենթակա չեն:

Ի դեպ, նշենք, որ այս գործով զբաղվում է Ոստիկանության Գյումրու Մուշի բաժինը: Տեղեկացանք, նաև որ կնոջը ծեծի ենթարկած անձնավորությունը եղել է ալկոհոլի ազդեցության տակ: Սակայն այս տեղեկությունը ևս ո՛չ հերքում են, ո՛չ հաստատում:

Ուշագրավն այն է, որ այս դեպքի հետ կապված իրավապահ համակարգին խիստ զգուշացում է տրվել՝ մեկնաբանություններ անելիս լինել զգուշավոր, աջ ու ձախ դեպքը քննարկման առարկա չդարձնել: Սա, թերևս արվում է այն պատճառով, որ տեղեկատվական արտահոսք չլինի:

Տեղեկացանք նաև, որ տուժածը Գյումրու Աճեմյան 26 հասցեի բնակիչ Ջուլիետա Ղուկասյանն է: Դեպքը տեղի է ունեցել լուսադեմին՝ ԱԺ պատգամավոր Վարդան Ղուկասյանի տան մոտակայքում, նա մեկնելիս է եղել իր կողմից մաքրվող տարածք՝ Տիգրան Մեծ փողոց: Ի դեպ, Ղուկասյանը բնակվում էր աղջկա հետ:

Հայկ Վարդանյան