ՍԴ-ն ուներ պատմական հնարավորություն առաջին անգամ անվավեր ճանաչել ընտրության արդյունքները. Օրբելյան․ ՏԵՍԱՆՅՈւԹ

Սահմանադրական դատարանի կողմից ընտրությունների արդյունքները վիճարկող դիմումները մերժելուց հետո, «Բարգավաճ Հայաստան» կուսակցության շահերի ներկայացուցիչ, փաստաբան Արամ Օրբելյանը շեշտեց, որ Բարձր դատարանը բաց թողեց պատմական հնարավորություն՝ առաջին անգամ անվավեր ճանաչելու ընտրությունների արդյունքները կամ առնվազն վերականգնելու խախտված իրավունքները․ «Վեց օր տևած դատական նիստերի ընթացքում մի քանի անգամ արձանագրել էի՝ այս բողոքարկումը որակապես տարբերվում էր մնացած բողոքարկումներից։ Ոչ թե նրա պատճառով, որ մնացած բողոքարկողները վատ էին բողոքարկել, այլ այս դեպքում մենք ունեինք շատ ունիկալ իրավիճակ, երբ մանդատներ ստանալ կամ չստանալու հանգամանքը կախված էր բացառապես Կենտրոնական ընտրական հանձնաժողովի կողմից ընդունված որոշմամբ»։

Օրբելյանի խոսքով՝ այս դատական վեճն ունիկալ էր նրանով, որ ԲՀԿ-ի՝ խորհրդարան անցնելու հարցը կախված էր բացառապես ԿԸՀ-ի մեկ որոշումից։ Նա ընդգծեց, որ նույնիսկ ԿԸՀ-ի աշխատակիցներն են ընդունել, որ 16 հազար մարդու կողմից 70 հազար տվյալների մուտքագրման պարագայում համակարգը չի կարող 100 տոկոսանոց ճշտություն ապահովել։ Ըստ փաստաբանի՝ այդ չնչին շեղումները բավարար էին, որպեսզի կիրառվեր «ի օգուտ ընտրողի» սկզբունքը և ԲՀԿ-ն ստանար իր մանդատները․ «Ցավոք սրտի, մենք չունեցանք այն, ինչ կարող էինք ունենալ։ Սահմանադրական դատարանը կարող էր վերահաստատել այդ խախտումները և դրանով իսկ բարձրացնել վստահությունը դատական համակարգի նկատմամբ»։

Փաստաբանը պնդում է, որ ներկայացված ապացույցները միանշանակ էին, սակայն դատարանը չցուցաբերեց անհրաժեշտ կամք։ «Սա այն դեպքն էր, երբ բոլորի աչքի առաջ ձայնագողություն տեղի ունեցավ, իսկ ՍԴ-ն չկանգնեցրեց դա»,- նշեց Օրբելյանը՝ հավելելով, որ ընդհանուր առմամբ գողացվել է ավելի քան 58,500 քաղաքացու ձայն։

Մանրամասները՝ տեսանյութում։