Ընտրակաշառքից մինչև պետական դավաճանության մեղադրանքներ․ քաղհալածյա՞լ են ընդդիմության դեմքերը․ ՏԵՍԱՆՅՈՒԹ

Այսօր առավոտյան, մինչ վարչապետ Նիկոլ Փաշինյանն ու Եվրոպական հանձնաժողովի նախագահ Ուրսուլա ֆոն դեր Լայենը մամուլի ասուլիսին ներկայացնում էին, թե ինչպես կարող է Եվրոպան օգնել Հայաստանին ՌԴ սահմանափակումների խստացման ֆոնին, Կառավարության շենքի դիմաց ընդդիմադիր ուժերը բողոքի ակցիա էին իրականացնում։  

«Մենք պարտավոր ենք ամբողջ գործիքակազմն օգտագործել, որպեսզի ստիպենք մարդկանց, ստիպենք աշխարհին, ստիպենք Եվրոպային խոսել Հայաստանում մարդու իրավունքների խախտումների մասին»,- ակցիայի ընթացքում ասաց ԱԺ «Պատիվ ունեմ» խմբակցության ղեկավար Հայկ Մամիջանյանը։

Մինչ ընդդիմությունը պնդում է՝ իրենց հետապնդում են քաղաքական մոտիվներով,  Հակակոռուպցիոն կոմիտեն շարունակում է գրեթե ամենօրյա ռեժիմով հաղորդագրություններ տարածել ընտրական ենթադրյալ հանցագործությունների բացահայտումների վերաբերյալ։ Տեսանյութերում նաև գաղտնալսումներ կան, որոնք վերագրվում են քաղաքական երեք ուժի՝ «Ուժեղ Հայաստան» ու «Հայաստան» դաշինքների և «Բարգավաճ Հայաստան» կուսակցության ներկայացուցիչներին ու համակիրներին։

Մեղադրյալի աթոռին հայտնված ընդդիմադիր գործիչները չեն ընդունում ընտրակաշառք տալու մասին մեղադրանքները։ 

Իրավապահ կառույցը, այնինչ, բացառում է քաղաքական հիմքով քրեական հետապնդում հարուցելու անգամ մեկ դեպք։ Այս մասին երեկ բարձրաձայնվեց նաև Սահմանադրական դատարանում՝ ընտրությունների արդյունքներն անվավեր ճանաչելու դիմումների քննության ժամանակ։

«Չկա օրինական ուժի մեջ մտած որևէ վարութային ակտ, որով կարձանագրվեր, որ որևէ քրեական վարույթ նախաձեռնվել է օրենքով չնախատեսված հիմքով, որ որևէ խափանման միջոց կիրառվել է անձի քաղաքական պատկանելության պատճառով, որ որևէ քննչական գործողություն կատարվել է քաղաքական նպատակադրումներով, դիմողների ներկայացուցիչների կողմից չհերքվեցին որևէ իրավական կամ փաստական հիմնավորմամբ»,- ՍԴ-ում իր եզրափակիչ ելույթում ասաց  Հակակոռուպցիոն կոմիտեի նախագահի տեղակալ Արմեն Ասատրյանը։

Ընտրական գործընթացի ժամանակ քաղաքական հայտնի ու անհայտ դեմքերին մեղադրանք առաջադրվեց ոչ միայն ընտրակաշառքի հոդվածով․ կրկին մեղադրյալի աթոռին հայտնվեցին Գագիկ Ծառուկյանը՝ այս անգամ առանձնապես խոշոր չափերով հարկերից խուսափելու հոդվածով, Ռոբերտ Քոչարյանը՝ պաշտոնեական լիազորությունների չարաշահման հոդվածով, Անդրանիկ Թևանյանը՝ պետական դավաճանության ու լրտեսության հոդվածներով, Ավետիք Չալաբյանը՝ ծառայողական լիազորությունները կամ դրանցով պայմանավորված ազդեցությունն օգտագործելով՝ մի խումբ մարդկանց ընտրելու իրավունքը խոչընդոտելու նախապատրաստության հոդվածով, Արմեն Աշոտյանը՝ պաշտոնեական լիազորությունները չարաշահելու, դրան օժանդակելու, ինչպես նաև առանձնապես խոշոր չափերով փողերի լվացման և դրան օժանդակելու հոդվածներով և այլք։ Ծառուկյանը և Քոչարյանը նոր մեղադրանքի մասին իմացան օդանավակայանում, երբ ցանկանում էին լքել երկիրը։

Եվ մինչ ընդդիմությունն պնդում է՝ դատական համակարգը ենթարկվում է գործադիր իշխանությանը, Փաշինյանը համարում է, որ արդարադատությունը կախում ունի ընդդիմադիր թևից։ 

«Կասեն՝ «այ, ուղիղ հրահանգ եք տալիս»։ Ժողովուրդն ինձ է ուղիղ հրահանգ տվել, ես էլ ժողովրդի ասածը փոխանցում եմ պետական ինստիտուտներին։ Որովհետև, ի վերջո, ժողովրդից եք սնվում։ Չի կարող լինել օլիգարխիական դատական համակարգ Հայաստանի Հանրապետությունում։ Ամեն օր ես դրա դեմ պայքարելու եմ։ Ամեն օր բոլոր հնարավոր և անհնար միջոցներով։ Հիմա ով ոնց ուզում է՝ գնահատի․ ասել եմ՝ Ռոբերտ Քոչարյանը պիտի նստի»,- լրագրողների հետ ճեպազրույցի ժամանակ ասաց վարչապետը։

Ամփոփված վերջին տվյալներով՝ ընտրական ենթադրյալ հանցագործությունների մասով այս պահին առկա է 125 քրեական վարույթ, 248 մեղադրյալ և 108 կալանավոր, դատարան է ուղարկվել մեղադրական եզրակացությամբ 21 քրեական վարույթ՝ 90 անձի վերաբերյալ։ Դատարանի վճիռներն այս գործերով ում ավելի շատ կբավարարեն՝ իշխանությա՞նը, թե՞ ընդդիմությանը․ այս հարցի պատասխանը, թերևս, պարզ կդառնա առաջիկա ամիսների ընթացքում։ 

Մանրամասները՝ տեսանյութում։

Ռոզա Վարդանյան