Դիմումատուներից որոշները փորձել են տապալել սահմանադրական կարգը, բայց այդ փորձը հաղթահարվել է. Գալյան․ ՏԵՍԱՆՅՈՒԹ

Սահմանադրական դատարանում ընտրությունների արդյունքների վիճարկման գործով նիստի ժամանակ ամփոփիչ ելույթով հանդես եկավ իշխող քաղաքական ուժ՝ «Քաղաքացիական պայմանագիր» կուսակցության ներկայացուցիչ, արդարադատության նախարար Սրբուհի Գալյանը։

Նա անդրադարձավ դիմող կողմերի բոլոր հիմնական պնդումներին՝ վարչական ռեսուրսի չարաշահումից մինչև ընտրակաշառքի և ատելության խոսքի վերաբերյալ մեղադրանքներին։ Պատասխանելով վարչական ռեսուրսի չարաշահման մեղադրանքներին՝ բանախոսը նշեց, որ դիմողները փորձում են կառավարության բնականոն աշխատանքը ներկայացնել որպես խախտում։

«Դիմողները պնդում են, որ չարաշահվել է վարչական ռեսուրսը։ Բայց երբ փորձում ենք հասկանալ այդ պնդման բովանդակությունը, պարզվում է, որ դրա տակ հիմնականում դրվում է կառավարության բնականոն գործունեությունը։ Ի՞նչ պետք է աներ կառավարությունը՝ դադարեցնե՞ր իր գործունեությունը, չիրականացնե՞ր կառավարության ծրագրով նախատեսված միջոցառումները։ Օրինակ՝ չշարունակե՞ր առողջապահության համընդհանուր ապահովագրության տարիներ տևած ռեֆորմը, չշարունակե՞ր սոցիալական միջոցառումների իրականացումը, չիրականացնե՞ր կառավարության ծրագրով նախատեսված միջոցառումները։ Եթե սա է դիմողների չափանիշը, ապա յուրաքանչյուր ընտրությունից առաջ պետությունը պետք է պարզապես դադարի կառավարել երկիրը»,- ասաց նախարարը։

Գալյանն իր ելույթում անդրադարձ կատարեց հաղթանակի վերաբերյալ հայտարարությունների ժամկետներին։ Իշխանության ներկայացուցիչը հիշեցրեց, որ մինչ վարչապետը գիշերվա ժամը 2-ին էր հայտարարել հաղթանակի մասին, ընդդիմադիր որոշ ուժեր դա արել էին դեռ ժամը 20:00-ին․

«Դիմողների քաղաքական դաշտի ներկայացուցիչները դեռևս ժամը 20:00-ի սահմաններում արդեն հայտարարել էին իրենց հաղթանակի մասին։ Մենք հաշվել էինք քվեարկողների ձայները։ Դիմողներն ի՞նչն էին հաշվել քվեարկության ավարտից անմիջապես հետո, երբ ձայներն ուղղակի ֆիզիկապես ժամը 20:00-ի դրությամբ հնարավոր չէր հաշվել։ Ի՞նչն էին հաշվել, որ ասում էին՝ հաղթել ենք։ Ես կարող եմ հայտարարություն անել, որ հաշվել էին  ենթադրաբար բաժանված կաշառքի չափը։ Ինչո՞ւ է սա կարևոր շեշտադրել, որովհետև ցույց է տալիս ընտրությունների արդյունքի վրա ազդելու իրական փորձը ու ժողովրդի կողմից դրա հաղթահարման փաստը»։

Անդրադառնալով քարոզարշավի ծախսերին՝ Գալյանը պնդեց, որ «Քաղաքացիական պայմանագիր»-ը եղել է ամենաթափանցիկը՝ հայտարարագրելով ամենաշատ ծախսերը։ Նա նաև քննադատեց այն դիմումատուներին, որոնք կուսակցություն են դարձել ընտրությունների նախաշեմին՝ ֆինանսական վերահսկողությունից խուսափելու նպատակով․ «Հատկանշական է, որ ֆինանսավորման թափանցիկության խնդիր բարձրացնում է նաև այն դիմումատուն, որը կուսակցություն գրանցել է ընտրությունների նախաշեմին, իսկ մինչ այդ ունեցել է շարժման կարգավիճակ։ Ինչո՞ւ՝ որ խուսափի կուսակցությունների ֆինանսական թափանցիկության կարգավորումներին ենթարկվելուց։ Հարց՝ ո՞վ է փորձել ազդել ընտրության արդյունքի վրա։ Պատասխանը պարզ է, իսկ արդյունքն այն է, որ ժողովուրդը հաղթահարել է այդ փորձը»։

ՔՊ ներկայացուցիչը հերքեց նաև իրավապահ մարմինների կողմից քաղաքական թիրախավորման մեղադրանքները։ Ըստ նրա՝ ոստիկանությունն ու քննչական մարմինները պարզապես կատարել են իրենց պարտքը՝ բացահայտելով ընտրակաշառքի սխեմաները։

«Ընդդիմությունը դժգոհում է, որ զրկվել է ընտրությունների վրա ազդելու հնարավորությունից, բայց դա արվել է հանուն օրինականության»,- ասաց Գալյանը”

Ելույթի ավարտին նա վերահաստատեց, որ ընտրությունների արդյունքներն անվավեր ճանաչելու որևէ իրավական հիմք չկա, քանի որ դիմողների ներկայացրածը ոչ թե ապացուցված փաստեր են, այլ սուբյեկտիվ ենթադրություններ։

Մանրամասները՝ տեսանյութում։