10.10.2026 | 18:18
ԶՈՒ ԳՇ պետն այցելել է մի շարք զորամասեր
Դեկտեմբերին կայանալիք ԱԺ լիագումար նիստերը չեղարկվել են. պատճառը հայտնի է
23.11.2018 | 18:33
Ազգային ժողովի առաջիկա քառօրյա նիստերը չեն կայանալու: Այս մասին Factor.am-ի հարցին ի պատասխան ասաց ԱԺ աշխատակազմի ղեկավարի տեղակալ Արսեն Բաբայանը:
Նշենք, որ Ազգային ժողովի պաշտոնական կայքի համաձայն՝ դեկտեմբերի 4-ին, 5-ին, 6-ին և 7-ին նախատեսված էին ԱԺ հերթական քառօրյա նիստեր: Սակայն, ինչպես մեզ տեղեկացրեց Արսեն Բաբայանը, խորհրդարանի նախագահ Արա Բաբլոյանը որոշել է նիստեր չհրավիրել: Պատճառն այն է, որ նոյեմբերի 26-ից մեկնարկում է արտահերթ ընտրությունների քարոզարշավը, և հավանական է, որ թեկնածու համարվող պատգամավորները չեն ներկայանա նիստին: Այս պարագայում կանխատեսելի է նաև, որ քվորում չի ապահովվի, ուստի որոշվել է նիստեր չհրավիրել:
Մեզ հայտնի դարձավ նաև, որ Ազգային ժողովի նիստերից պատգամավորների բացակայելը հարգելի համարելու առաջարկությամբ խորհրդարանի նախագահին դիմել են նաև խմբակցությունների ղեկավարները: Ըստ էության՝ նրանց առաջարկությունն ընդունվել է։
Նշենք, որ նոյեմբերին տեղի ունեցած լիագումար նիստերը մեծ դժվարությամբ էին գումարվում՝ քվորում չլինելու պատճառով:
Հայկ Վարդանյան
