Ռուսաստանը հարվածել է Դնեպրոպետրովսկին և Օդեսային. զոհեր և վիրավորներ կան

Ռուսական բանակը հրթիռային հարված է հասցրել ուկրաինական Դնեպրոպետրովսկի մարզին, հայտնել է մարզային վարչակազմի ղեկավար Ալեքսանդր Գանժան։ Հարվածների հետևանքով զոհվել է երկու մարդ, վիրավորվել՝ հինգը, գրում է Current time-ը։

Նիկոպոլի շրջանում ռուսական կողմը հարձակվել է Նիկոպոլի, Պոկրովսկ Միրովսկայա, Մարգանեց և Չերվոնոգրիգորովսկա համայնքների վրա։ Հարձակումների հետևանքով զոհվել է երկու մարդ, վիրավորվել՝ չորսը։ Վնասվել են նաև ենթակառուցվածքներ, բնակելի շենքեր և տրանսպորտային միջոցներ։

Գանժան Տելեգրամում գրառման մեջ նշել է նաև, որ Դնեպրոյում ռուսական հարձակման հետևանքով վիրավորվածների թիվը հասել է 18-ի, այդ թվում՝ երկու տարեկան աղջիկ և 10 տարեկան տղա։ Վիրավորներից ութը հոսպիտալացվել են՝ չորս կին և չորս տղամարդ։

Սինելնիկովսկի շրջանում հարվածների հետևանքով ոչնչացվել են մասնավոր տներ և մեքենաներ, վիրավորվել է 41-ամյա մի տղամարդ։ Կիրակի հարձակման է ենթարկվել նաև Կրիվոյ Ռոգը։

Ռուսական զորքերը մայիսի լույս 18-ի գիշերը հարվածային անօդաչու թռչող սարքերով հարձակվել են Օդեսայի վրա։ Քաղաքային վարչակազմի ղեկավար Սերգեյ Լիսակի խոսքով՝ վնասվել են բնակելի շենքեր, լիցեյ և մանկապարտեզ։ Վիրավորվել է երկու մարդ, այդ թվում՝ 11-ամյա տղա։

Ուկրաինայի ռազմաօդային ուժերի հրամանատարության տվյալներով՝ մայիսի լույս  18-ի գիշերը ռուսական ուժերը երկրի ուղղությամբ արձակել են 24 հրթիռ և 524 տարբեր տեսակի անօդաչու թռչող սարքեր։ Խոցվել է 4 հրթիռ և 503 անօդաչու թռչող սարք։ Հարձակման հիմնական թիրախը Դնեպրն ու Դնեպրոպետրովսկի մարզն են եղել։