27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
Թուրքիայի ցամաքային զորքերի հրամանատարն այցով Ադրբեջանում է
Քաղաքականություն
27.04.2026 | 22:34
Ադրբեջանի բանակի գլխավոր շտաբի պետ, պաշտպանության նախարարի առաջին տեղակալ Քերիմ Վելիևն այսօր հանդիպել է Թուրքիայի զինված ուժերի ցամաքային զորքերի հրամանատար, բանակի գեներալ Մեթին Թոքելի գլխավորած պատվիրակության հետ, որը պաշտոնական այցով գտնվում է Ադրբեջանում: Երկրի ՊՆ-ի հաղորդմամբ՝ Վելիևը նշել է ադրբեջանա-թուրքական ռազմական համագործակցության անընդհատ զարգացումը և այդ կապերի հետագա ընդլայնման կարևորությունը։
Խոսելով Ադրբեջանում անցկացված «TurAz Qartali-2026» համատեղ մարտավարական-թռիչքային զորավարժությունների մասին, որոնց մասնակցել են Ադրբեջանի և Թուրքիայի զինծառայողները, Վելիևն ընդգծել է, որ նման զորավարժությունները կարևոր են երկկողմ համագործակցության զարգացման համար և նպաստում են տարածաշրջանի անվտանգությանը:
Թոքելը շեշտել է փոխայցելությունների շարունակականության կարևորությունը ռազմական համագործակցության ընդլայնման համար, որը ներառում է նաև ռազմավարական դաշինքը։
Հանդիպմանն ընդգծվել է ժամանակակից տեխնոլոգիական նորարարությունների կիրառմամբ անցկացվող համատեղ և բազմազգ զորավարժությունների կարևորությունը երկու երկրների զինծառայողների պրոֆեսիոնալիզմի բարձրացման և գործնական հմտությունների կատարելագործման համար։
Կողմերը քննարկել են ադրբեջանա-թուրքական ռազմական համագործակցության տարբեր ոլորտներ։
Թարգմանությունը՝ Էմմա Չոբանյանի
