Ադրբեջանում ուկրաինական ռազմական խումբ է տեղակայված. Զելենսկիի և Ալիևի հանդիպման հետքերով

Ուկրաինայի նախագահ Վլադիմիր Զելենսկին այցելել էր Ադրբեջան, որտեղ նախագահ Իլհամ Ալիևը քննարկել էին  անվտանգության և էներգետիկայի ոլորտում համագործակցությունը, ստորագրել համագործակցության ընդլայնման վեց համաձայնագիր։ Այնտեղ գտնվելու ընթացքում Զելենսկին հանդիպել է ուկրաինական խմբի հետ, որը տեղակայված է Ադրբեջանում՝ «երկնքի և կարևորագույն ենթակառուցվածքների պաշտպանության ոլորտում փորձն ու գիտելիքները» կիսելու համար, գրում է OC media-ն։

Այցի հիմնական մասը տեղի է ունեցել Ադրբեջանի հյուսիսում՝ հարավից Ռուսաստանին սահմանակից Գաբալայում, ապրիլի 25-ին։ Սա Զելենսկիի առաջին պաշտոնական այցն էր Ադրբեջան։

Ընդլայնված հանդիպումից հետո տեղի ունեցած համատեղ մամուլի ասուլիսում Ալիևն ասել է, որ քննարկել են «համատեղ նախաձեռնություններ, այդ թվում՝ ներդրումներին վերաբերող հարցեր»։

«Մեր առևտրաշրջանառությունը գերազանցել է կես միլիարդ դոլարը»,- ասել է Ալիևը։

Նա նշել է, որ քննարկել են ռազմական համագործակցությունը, և որ կան «համատեղ արտադրության հիանալի հնարավորություններ»։

Իր հերթին, Զելենսկին խոսել է այդ օրը ստորագրված վեց համաձայնագրերի մասին՝ ասելով, որ «թիվ մեկ ոլորտն անվտանգությունն է»։

«Ուկրաինան ցուցաբերել է դիմադրողականություն ագրեսորի դեմ այս պատերազմի ընթացքում և այժմ կիսվում է իր փորձով։ Այսօր ես խոսեցի մեր փորձագետների հետ, որոնք այժմ գտնվում են Ադրբեջանում։ Նրանք, անշուշտ, աջակցում են մեր գործընկերներին։ Իհարկե, մենք կզարգացնենք մեր համագործակցությունն ու համատեղ արտադրությունը»,- ասել է նա։

Զելենսկին հանդիպել է թիմի հետ, որի ղեկավարը նրան ներկայացրել է «իրենց աշխատանքի նախնական արդյունքները», որոնք, ըստ Ուկրաինայի, իրականացվում էին Ուկրաինայի կողմից նախաձեռնված միջազգային համագործակցության ծրագրի շրջանակում։

Դեռևս պարզ չէ, թե ինչպիսի աջակցություն է ցուցաբերում ուկրաինական փորձագետների թիմն Ադրբեջանին։ Սակայն ապրիլի 19-ին Զելենսկին հայտարարել էր, որ Ուկրաինան Մերձավոր Արևելքի երկրների հետ ստորագրել է պաշտպանության արտահանման համաձայնագրեր՝ անօդաչու թռչող սարքերի և ինտեգրված հակաօդային պաշտպանության համակարգերի վերաբերյալ։

«Մենք արդեն ունենք հարցումներ ևս 11 երկրներից՝ Մերձավոր Արևելքից և Պարսից ծոցից, և մենք աստիճանաբար դիտարկում ենք նաև Կովկասը»,- գրել է Զելենսկին X-ում։

Այդ ժամանակից ի վեր ենթադրություններ էին առաջացել այն մասին, թե կովկասյան որ երկրի մասին է նա խոսում։

Մամուլի ասուլիսում Զելենսկին հավելել է, որ պաշտպանության և անվտանգության ոլորտում Ադրբեջանի հետ համագործակցությունն «այսօր շատ լուրջ քայլ է կատարել՝ ստորագրելով համապատասխան փաստաթղթերը»։ Նա ընդգծել է, որ այս համագործակցությունը «ոչ միայն զենքի մասին է», այլև «գլոբալ՝ ազգերի կայունության հարց»։

Զելենսկին հույս է հայտնել, որ Ռուսաստանի հետ բանակցությունները տեղի կունենան Ադրբեջանում, «եթե Ռուսաստանը պատրաստ լինի դիվանագիտության»։ Նա նաև շնորհակալություն է հայտնել Ալիևին պատերազմի ընթացքում Ադրբեջանի կողմից Ուկրաինա ուղարկված մարդասիրական օգնության համար։

Թարգմանությունը՝ Էմմա Չոբանյանի