Շախմատի միջազգային Ֆեդերացիան (ՖԻԴԵ) հանդես է եկել հայտարարությամբ՝ Հայաստանի շախմատի ֆեդերացիայի նախագահի առաջին տեղակալ, գրոսմայստեր Սմբատ Լպուտյանի ձերբակալման առնչությամբ։
«ՖԻԴԵ-ն հաստատում է, որ տեղյակ է Հայաստանում ստեղծված իրավիճակին և Հայաստանի շախմատի ֆեդերացիայի նախագահի առաջին տեղակալ, գրոսմայստեր Սմբատ Լպուտյանին առաջադրված նախնական մեղադրանքներին:
Գրոսմայստեր Լպուտյանը անձ է, որը նշանակալի ներդրում է ունեցել շախմատի զարգացման մեջ՝ ինչպես շախմատի խաղատախտակի շուրջ, այնպես էլ Հայաստանի շախմատի ֆեդերացիայում իր երկարամյա գործունեությամբ, և մենք հույս ունենք, որ իրավիճակը արագ կլուծվի օրենքի շրջանակներում՝ լիակատար հարգանքով բոլոր ներգրավված անձանց իրավունքների նկատմամբ։
Առանձին ցանկանում ենք նշել, որ «Շախմատ» գիտահետազոտական ինստիտուտի գործունեությունը երկար ժամանակ կարևոր է եղել շախմատի գիտության զարգացման և ՖԻԴԵ-ի կրթական ծրագրերի համար։ Սա հատկապես կարևոր է՝ հաշվի առնելով, որ «Շախմատը դպրոցներում» ծրագիրը ՖԻԴԵ-ի այս տարվա գործունեության առաջնահերթ ուղղություններից մեկն է»,- ՖԻԴԵ-ի հայտարարությունը փոխանցում է ՀՇՖ մամուլի ծառայությունը։
Հիշեցնենք, որ Սմբատ Լպուտյանն օրեր առաջ ձերբակալվել էր։ Ավելի ուշ Լպուտյանն ազատ էր արձակվել արձակվել, նրա նկատմամբ որպես խափանման միջոց է ընտրվել բացակայելու արգելքը։ Նրան մեղադրանքներ են առաջադրվել Մանկավարժական համալսարանում գործող շախմատի գիտահետազոտական կենտրոնի գործունեության շրջանակներում պաշտոնական կեղծիքի և խարդախությանն օժանդակելու համար։
