Դավիթ Շահնազարյանը ԱԺ է գնում Արցախի հարցով դեբատներ կազմակերպելու համար, որքան էլ դա իշխանությունը չուզենա․ քաղտեխնոլոգ․ ՏԵՍԱՆՅՈՒԹ

Քաղտեխնոլոգ Վիգեն Հակոբյանի համոզմամբ՝ դեռ մայիս ամսից հստակ ձևակերպված էր արտահերթ ընտրություններ անցկացնելու հարցը, և այն, որ շատ քաղաքական ուժեր հայտարարում են, թե չեն հասցրել պատրաստվել, դրա պատճառը ոչ թե ընտրությունների անցկացման ժամկետի անսպասելիությունն էր, այլ դրանք նոր Ընտրական օրենսգրքով անցկացնելու ցանկությունը։

«Շատ շատերի համար բավականին տհաճ սյուրպրիզ էր, որ նոր ԸՕ-ը չանցավ»,- այսօր հրավիրված մամուլի ասուլիսի ժամանակ ասաց քաղտեխնոլոգը։

Անդրադառնալով ընտրություններին պատրաստված քաղաքական ուժերի ընտրացուցակներին՝ վերջինս առանձնացրեց ՀՀԿ-ի և իշխող ուժի ընտրացուցակները:

«ՀՀԿ-ի առաջին տասնյակում կլինեն մարդիկ, որոնց առաջադրումը քաղաքական նշանակություն ունի և մարդիկ, որոնք խորհրդարանում հայտնվելու պարագայում կարողանան հարցեր բարձրացնել․ օրինակ Դավիթ Շահնազարյանը կկարողանա Արցախի հարցով անընդհատ դեբատներ կազմակերպել, եթե անգամ իշխանությունը դա չուզի։ ՀՀԿ-ի ցուցակի առաջին շարքում հիմնականում խոսացող են»,- ասաց Հակոբյանը։

Անդրադառնալով «Իմ քայլը» կուսակցության ընտրացուցակին՝ Վիգեն Հակոբյանն ասաց, որ եթե անգամ ընտրությունները լինեին մի քանի ամիս անց, միևնույնն է՝ այդ ուժը ներկայանալու էր նույն էլեկտորատով։

«Այսօրվա իշխանության սոցիալական հենարանը փոխված է․ նրանք հիմնված են այն քաղաքացիական հոսանքների վրա, որոնք մասնակցել են ընտրություններին»,- ասաց նա։

Մանրամասները՝ տեսանյութում։