Պուտինը միջամտեց ՀՀ ներքին գործերին․ ԵՄ-ին մեղադրող ընդդիմությունն ինչո՞ւ չդատապարտեց ՌԴ նախագահին․ Լուսինե Հակոբյան. ՏԵՍԱՆՅՈՒԹ

Ռուսաստանի նախագահ Վլադիմիր Պուտինի հայտարարությունը ռուսամետ ուժերին աջակցելու մասին Հայաստանի ներքին գործերին բացահայտ միջամտություն է, իսկ այս կոնտեքստում  Եվրամիությանն ուղղված մեղադրանքները որևէ հիմք չունեն։ Այս մասին Factor TV-ի հետ զրույցում ասաց «Իրավունքի Եվրոպա» ՀԿ ղեկավար Լուսինե Հակոբյանը՝ ընդգծելով, որ այս հարցում ընդդիմադիր ուժերի լռությունը երկակի ստանդարտների դրսևորում է։

Անդրադառնալով ՌԴ նախագահի հայտարարությանը, որով նա, ըստ էության, կոչ էր անում վարչապետ Նիկոլ Փաշինյանին թույլ տալ բանտարկված, ՌԴ քաղաքացիություն ունեցող գործչին մասնակցել ընտրություններին, Լուսինե Հակոբյանը նշեց.

«Հստակ է, որ այստեղ նստած յուրաքանչյուր ոք գնահատելու է դա միջամտություն Հայաստանի ներքին գործերին։ Ընդ որում, այն, ինչում մեղադրում էին Եվրոպական միությանը՝ զուտ Հայաստանի ժողովրդավարական դիմակայունությանն ուղղված աջակցությունը հիբրիդային սպառնալիքների դեմ պայքարում, իհարկե, ոչ մի համեմատության եզր չունի այն ամենի հետ, ինչ որ կատարվեց Վլադիմիր Պուտինի բերանով»։

Հակոբյանի դիտարկմամբ՝ վարչապետի պատասխանն այս հարցում բավարար չէր. «Պետք է ասվեր, որ դա ուղղակի հրապարակային միջամտություն է Հայաստանի ներքին գործերի մեջ, և այն, ինչը որ մենք թույլ չենք տալիս Ռուսաստանի հանդեպ, Ռուսաստանի նախագահը ևս պետք է թույլ չտա Հայաստանի հանդեպ»։

Իրավապաշտպանը տարակուսում է, որ այն ուժերը, որոնք սուր քննադատության էին ենթարկում ԵՄ-ին, այժմ լռում են Ռուսաստանի միջամտության հարցում։

«Իսկապես, շատ հետաքրքիր է, թե ինչու են լռում այն ուժերը, որոնք Եվրոպական միությանն էին մեղադրում ընդամենը հիբրիդային սպառնալիքների դեմ պայքարում Հայաստանին խոստացված օժանդակության համար։ Այս պարագայում լռել և չասել, որ սա ուղղակի միջամտություն է Հայաստանի ներքին գործերին, հասկանալի է, որ գործ ունենք երկակի ստանդարտների հետ»,- նշեց նա։

Խոսելով ընտրություններում ֆինանսական միջոցների և խոշոր գործարարների դերակատարության մասին՝ Լուսինե Հակոբյանը նշեց, որ փողի գործոնը նշանակություն կունենա, և կիրառվելու են ընտրողին գումար հասցնելու տարբեր մեթոդներ։ Այս համատեքստում նա քննադատեց գործող իշխանություններին՝ նախկին պաշտոնյաների գույքի բռնագանձման հարցում դանդաղկոտության համար։

«Ինչո՞ւ այն մարդիկ, որոնք, բոլորս գիտեինք, ինչ ունեցվածքով եկան, դարձան նախագահ Հայաստանի Հանրապետությունում, ինչ ունեցվածքով հեռացան այդ պաշտոնից, ինչո՞ւ այդ մարդիկ հիմա ունեն այն հնարավորությունները, որ էլի մարդիկ պետք է կանգնեն այսքան տարի անց, ընտրեն, ընտրություն կատարեն սևի և սպիտակի միջև»,-ասաց Հակոբյանը։

Նա կոչ արեց քաղաքացիներին՝ գիտակցել իրենց պատասխանատվությունը և չտրվել ընտրակաշառքի գայթակղությանը։ «Զուտ ուզում եմ դիմել մեր քաղաքացիներին և ապավինել իրենց իմաստությանը և հորդորել, որ այդ գումարները իսկապես չվերցնեն և իրենց ընտրությունը կատարեն իրենց խղճի մտոք՝ իմանալով, որ իրենք տնօրինելու են մեր, մեր երեխաների, բոլորիս երեխաների և մեր պետության ճակատագիրը»։

Իրավապաշտպանը հիշեցրեց, որ ընտրակաշառք տալն ու վերցնելը հանցագործություններ են, և «հիվանդ է, երիտասարդ է» և նմանատիպ այլ պատճառաբանությունները չեն գործելու։ Ըստ Հակոբյանի՝ սպասելի է, որ նախընտրական շրջանում կլինեն նաև ընտրակեղծիքների մասին կեղծ տեղեկությունների տարածման փորձեր, ինչպես եղավ Գյումրու ընտրություններից առաջ։ Նա կարծում է, որ այս դեպքում պետական համապատասխան մարմինները պետք է ակտիվորեն զբաղվեն հանրային իրազեկմամբ և ռազմավարական հաղորդակցությամբ։

Հարցազրույցն ամբողջությամբ՝ տեսանյութում։

Ռոբերտ Անանյան