16.05.2026 | 21:37
Փաշինյանը ներկայացրել է վարորդական իրավունքից զրկված անձանց խնդրի լուծման իր տարբերակը
Գլխավոր դատախազությունն ուսումնասիրում է Factor TV-ի հրապարակումը
Հասարակություն
19.03.2026 | 16:01
Գլխավոր դատախազությունն ուսումնասիրում է «900 հազար դոլար՝ անորակ սալիկների ու չորացած տույաների համար․ ինչո՞ւ է ստել Երևանի քաղաքապետարանը» վերնագրով հրապարակումը:
Այս մասին Factor TV-ի գրավոր հարցմանն ի պատասխան հայտնել են Դատախազությունից:
Մենք պարզել էինք, որ մեկուկես տարի առաջ 900 հազար դոլարով բարեկարգված Սուրբ Գրիգոր Լուսավորիչ եկեղեցուն հարակից այգում 40 տույաներից մնացել է 26-ը, 24 աղբամանից՝ 10-ը, նստարանները գունաթափված են, դեկորատիվ թփերի մի մասը չկա, սալիկներն էլ կոտրված են։
2024-ի հուլիսին Factor TV-ն պարզել էր, որ ընդամենը ամիսներ առաջ տնկված տույաները, որոնցից յուրաքանչյուրը ձեռք էր բերվել 214 հազար դրամով, չորացել էին։ Այդ ժամանակ քաղաքապետարանից մեզ հայտնել էին, որ պուրակը դեռ շահագործման չի հանձնվել, այնինչ մեր հրապարակումից 3 ամիս առաջ քաղաքային իշխանությունը հայտարարել էր, որ շինաշխատանքներն ավարտին են հասել։
Բլոգեր Արթուր Չախոյանի գրավոր հարցմանն ի պատասխան Երևանի քաղաքապետարանից հայտնել էին, որ շինարարից աշխատանքներն ընդունել են 2024-ի մայիսի 14-ին։ Այսինքն՝ ստացվում է, որ շինբարեկարգման վարչությունը դա արել է մեր հրապարակումից 3 ամիս առաջ, բայց երբ բարձրաձայնել ենք թերությունների մասին՝ ասել են, որ շահագործման հանձնված չէ։
Գլխավոր դատախազությունն ուսումնասիրության արդյունքների վերաբերյալ մանրամասներ չի հայտնել:
Արփի Հակոբյան
