17.08.2026 | 23:08
Զորականում և Ամասիայում շչակներ են փորձարկվելու
Բռնության ենթարկված փոքրիկի 4 տարեկան քույրը տեղափոխվել է ՀՕՖ․ հիմա բուժզննում է անցնում
Հասարակություն
19.03.2026 | 12:40
Խորթ մոր կողմից բռնության ենթարկված և «կլինիկական մահ» ախտորոշմամբ Արաբկիր բժշկական կենտրոն տեղափոխված 1-ամյա երեխայի 4-ամյա քույրը տեղափոխվել է ՀՕՖ-ի «Մարդիգյան» երեխաների պաշտպանության կենտրոն։ Այս մասին Factor.am-ին հայտնեցին կենտրոնից։
4-ամյա երեխան մորական տատի խնամքին էր։ Սոցիալական աշխատողներն են որոշել նրան տեղափոխել ՀՕՖ։ Կենտրոնից տեղեկացրին, որ երեխան այժմ բուժզննում է անցնում, նրա մոտ առողջական խնդիրներ են հայտնաբերվել։
Թե երեխան որքան կմնա ՀՕՖ-ի «Մարդիգյան» երեխաների պաշտպանության կենտրոնում, դեռ պարզ չէ։
Նշենք, որ մարտի 16-ին Արաբկիր բժշկական կենտրոն տեղափոխված 1-ամյա երեխան դեռ վերակենդանացման բաժանմունքում է, վիճակը՝ ծանր։
Հավելենք, որ փոքրիկը ԲԿ էր տեղափոխվել մարտի 16-ին «կլինիկական մահ» ախտորոշմամբ։ Ժամեր անց ՆԳՆ-ն հայտնել էր, որ Արարատի մարզում մեկ տարեկան երեխայի սպանության փորձի համար ձերբակալվել է մեկ անձ։ Գլխավոր դատախազությունից հայտնել են, որ 1-ամյա երեխան այս տարվա հունվարի 22-ից մինչև մարտի 10-ը պարբերաբար ֆիզիկական ներգործության է ենթարկվել, իսկ մարտի 15-ին փորձել են դիտավորությամբ կյանքից զրկել փոքրիկին։ Հանրային քրեական հետապնդում էր հարուցվել երեխայի հոր երկրորդ կնոջ նկատմամբ։ Նա երեկ երեկոյան երկու ամսով կալանավորվել է։
Արփի Հակոբյան
