Առաջարկում եմ ժողովրդավարական ընդդիմությանը սկսել բանակցություն համախմբման նպատակով. Դավիթ Սանասարյան․ ՏԵՍԱՆՅՈՒԹ

«Ինքնիշխան Հայաստան» կուսակցության նախագահ Դավիթ Սանասարյանը Factor TV-ի հետ զրույցում անդրադարձել է ներքաղաքական կյանքին, առաջիկա ընտրություններին իր ղեկավարած ուժի մասնակցությանը և իշխանությունների վարած քաղաքականությանը։ Նա հայտարարել է, որ իր կուսակցությունը մտադիր է մասնակցել ընտրություններին և հրապարակային քննարկման հրավիրել քաղաքական ուժերին՝ միավորման հնարավորությունները քննարկելու համար։ 

Սանասարյանը նշել է, որ իր երկարատև լռությունը պայմանավորված էր դատական գործով, որով նա արդարացվել է առաջին ատյանում։ Անդրադառնալով քաղաքական դաշտին՝ նա ընդգծել է․ «Ես տեսնում եմ, որ մենք ունենք գոյաբանական խնդիր, ոչ թե զուտ ընտրություն է։ Քաղաքական դաշտը շատ ծանր վիճակում է»։

Սանասարյանը քննադատել է հեղափոխությունով եկած իշխանությանը։ «Ռեսուրս ունեցող մարդիկ, օլիգարխները, ինչ ուզում եք ասեք, այդ մարդիկ ստարտային պայմաններում ավելի լավ վիճակում են, քան մենք», – ասել է նա՝ հավելելով, որ իրենց հիմնական ռեսուրսը «ազնվությունն ու անցած ճանապարհն է»։

Նա մեղադրել է իշխանություններին յոթ տարի շարունակ «սև ու սպիտակի» և «ներկա-նախկին» բաժանման վրա խաղալու մեջ։ Խոսելով ընդդիմադիր դաշտի մասին՝ Սանասարյանը հրապարակային հրավեր է ուղղել այն քաղաքական գործիչներին, որոնք «իրենց չեն տեսնում որպես իշխանության թիկունք»։

«Ես հրավիրում եմ, բայց ոչ թե ասում եմ՝ եկեք միացեք ինձ։ Ես կարող եմ մոդերացիայի դեր ստանձնել։ Եթե չորս-հինգ ուժ կամ հանրային հնչեղություն ունեցող գործիչ գան սեղանի շուրջ, ես կլինեմ ամենավերջին համարը։ Այսինքն, հիմիկվանից ասում եմ, որ ես ցուցակի կռիվ չեմ տալու», – հայտարարել է նա՝ ընդգծելով, որ իր գլխավոր ամբիցիան «երկիրը փոխելն է»։

Դավիթ Սանասարյանը, որը մասնակցել է 44-օրյա պատերազմի հանգամանքներն ուսումնասիրող քննիչ հանձնաժողովի աշխատանքներին, հայտարարել է, որ թեմայի փակումը գործարք էր։ «Ինչի՞ համար պարտակեցին այդ քննիչ հանձնաժողովի արդյունքները։ Մոզաիկա են արել։ Գինը բարձրացրին, գործարք արեցին։ Ուրիշ տարբերակ չգիտեմ», – ասել է նա։

Սանասարյանը նշել է, որ պատերազմի ժամանակ Հայաստանն ունեցել է ինքնիշխանության խնդիր, սակայն մանրամասներ չի հայտնել՝ պատճառաբանելով գաղտնիության ստորագրությունը։ «Բայց որ այսպես շարունակվի, մի օր միգուցե կարտահայտվեմ», – հավելել է նա։

Անդրադառնալով խաղաղության գործընթացին՝ Սանասարյանը կասկած է հայտնել դրա անկեղծության վերաբերյալ։ «Ալիևը չի կրակում։ Այդ իր չկրակելը մեր վրա ավելի թանկ է նստում», – ասել է նա՝ պնդելով, որ խաղաղությունը հնարավոր է միայն Հայաստանի հզորացման պարագայում։ «Սեփական ժողովրդին հնարավոր պատերազմով վախեցնելով մենք շատ վատ բան ենք անում»։

Սանասարյանը քննադատել է իշխանություններին Արցախի հարցը «փակելու» փորձերի և Արցախի ներկայացուցիչների հետ հանդիպումներից խուսափելու համար։ «Բնականաբար, Արցախահայերի Արցախ վերադառնալու հարցը պետք է մեր օրակարգում լինի», – եզրափակել է նա։

Հարցազրույցն ամբողջությամբ՝ տեսանյութում։

Ռոբերտ Անանյան