17.08.2026 | 23:08
Զորականում և Ամասիայում շչակներ են փորձարկվելու
ՆԱՏՕ-ն Հարավային Կովկասում նոր հատուկ ներկայացուցիչ է նշանակել
Քաղաքականություն
06.03.2026 | 14:44
ՆԱՏՕ-ն հայտարարել է դեսպան Քևին Հեմիլթոնին Հարավային Կովկասում և Կենտրոնական Ասիայում հատուկ ներկայացուցչի պաշտոնում նշանակելու մասին։ Նշվում է, որ Քևին Հեմիլթոնը ՆԱՏՕ-ի գլխավոր քարտուղարի Կովկասի և Կենտրոնական Ասիայի հարցերով հատուկ ներկայացուցիչն է։ Նա պատասխանատու է այս երկու ռազմավարական կարևոր տարածաշրջաններում Դաշինքի քաղաքականության առաջխաղացման համար։
Հեմիլթոնը նաև ՆԱՏՕ-ի գլխավոր քարտուղարի գործընկերության հարցերով տեղակալի օգնականն է՝ քաղաքական հարցերի և անվտանգության քաղաքականության բաժնում։
Հաղորդվում է, որ Կանադայի արտաքին քաղաքական ծառայության կադրային աշխատակից լինելով՝ նա 2023-2026 թվականներին ծառայել է որպես Կանադայի դեսպան Թուրքիայում, միաժամանակ, հավատարմագրվելով Ադրբեջանում և Վրաստանում: Ավելի վաղ նա եղել է դեսպան Ռումինիայում, Բուլղարիայում և Մոլդովայում (2016-2020):
2020-ից 2023 թվականներին Քևին Հեմիլթոնը եղել է Կանադայի գլոբալ հարցերով գրասենյակի միջազգային անվտանգության քաղաքականության գլխավոր տնօրեն՝ պատասխանատու լինելով միջազգային պաշտպանության և անվտանգության հարաբերությունների, ՆԱՏՕ-ի և տրանսատլանտյան անվտանգության, Հյուսիսային Ամերիկայի պաշտպանական համագործակցության, Հնդկա-խաղաղօվկիանոսյան անվտանգության քաղաքականության, ինչպես նաև զենքի չտարածման և զենքի վերահսկողության համար։
2013-2016 թվականներին նա Արևելյան Եվրոպայի ու Եվրասիայի բաժնի տնօրենն է եղել, որը պատասխանատու էր Կանադայի քաղաքական և առևտրային հարաբերությունների համար 19 եվրոպական և եվրասիական երկրների հետ, որոնք ընդգրկում էին Արևմտյան Բալկանները մինչև Կենտրոնական Ասիա։
Հեմիլթոնը նաև ծառայել է Կանադայի դեսպանատներում Թել Ավիվում և Սարաևոյում։
Թարգմանությունը՝ Էմմա Չոբանյանի
