13.05.2026 | 17:20
ԱՄՆ-ի և Չինաստանի առևտրային ներկայացուցիչները բանակցություններ են վարել Թրամփ-Սի գագաթնաժողովից առաջ
Հայաստանն ու Ղազախստանը կհամագործակցեն ռազմական հետախուզության ոլորտում
Քաղաքականություն
05.03.2026 | 10:20
«Հայաստանի Հանրապետության կառավարության և Ղազախստանի Հանրապետության կառավարության միջև ռազմական հետախուզության ոլորտում համագործակցության մասին» համաձայնագիր կստորագրվի։ Նախագիծը կառավարության օրակարգում է։
Նախաձեռնությունը միտված է երկու երկրների միջև պաշտպանության ոլորտում համագործակցության խորացմանը և ռազմական հետախուզության ուղղությամբ փոխգործակցության իրավական հիմքի ձևավորմանը։
Համաձայնագրով նախատեսվում է՝ լիազորված մարմինների ղեկավարների պաշտոնական այցեր և աշխատանքային հանդիպումներ, ահաբեկչական և ծայրահեղական կազմակերպություններին հակազդման, ինչպես նաև փոխադարձ հետաքրքրություն ներկայացնող ռազմաքաղաքական իրադարձությունների վերաբերյալ հետախուզական տեղեկատվության փոխանակում, մարտական պատրաստության համատեղ միջոցառումների անցկացում, համագործակցության այլ ուղղությունների զարգացում՝ փոխադարձ համաձայնությամբ։
Փաստաթուղթը սահմանում է, որ կողմերը չեն իրականացնելու միմյանց դեմ ուղղված ռազմական հետախուզական գործունեություն, իսկ համագործակցության ընթացքում ստացված տեղեկատվությունը ենթակա է պաշտպանության և չի կարող փոխանցվել երրորդ կողմի առանց համապատասխան գրավոր համաձայնության։
Նշվում է, որ համաձայնագրի ստորագրումը համապատասխանում է Հայաստանի ռազմավարական շահերին և բխում է ՀՀ կառավարության 2021–2026 թվականների ծրագրի՝ պաշտպանության ոլորտի բարեփոխումների դրույթներից։ Այն նպատակ ունի ընդլայնել ռազմական հետախուզության ոլորտում միջազգային համագործակցությունը և խորացնել երկկողմ փոխվստահությունը։
Հայաստանի և Ղազախստանի հարաբերությունները հիմնված են 1999 թվականի սեպտեմբերի 2-ին ստորագրված բարեկամության և համագործակցության պայմանագրի վրա, ինչը ստեղծել է լայն իրավական դաշտ երկկողմ կապերի զարգացման համար։
Նարեկ Կիրակոսյան
