22.04.2026 | 21:01
Մարտին Պողոսյանը՝ ծանրամարտի Եվրոպայի առաջնության բրոնզե մեդալակիր
Նոր պաշտոնանկություններ ՆԳՆ-ում առանց բացատրության. ՏԵՍԱՆՅՈՒԹ
Քաղաքականություն
04.03.2026 | 21:02
ՆԳՆ-ում պաշտոնանկությունները հաջորդում են մեկը մյուսին։ Նախարար Արփինե Սարգսյանի հրամանով ծառայությունից ազատվել են ոստիկանության պարեկային ծառայության Երևան քաղաքի գնդի հրամանատար, ոստիկանության փոխգնդապետ Անդրանիկ Իսախանյանը և համայնքային ոստիկանության գլխավոր վարչության օպերատիվ-վերլուծական վարչության պետի տեղակալ, ոստիկանության գնդապետ Արթուր Բդոյանը։
«Վերջին երեսուն տարիներին միշտ եղել են և կլինեն փոփոխություններ, պաշտոնանկություններ։ Ի՞նչն է արտասովոր»,- զարմանում է ՔՊ-ական պատգամավոր Սիսակ Գաբրիելյանը։
Մինչ համայնքային ոստիկանությունում պաշտոն զբաղեցնելը՝ Արթուր Բդոյանը Քրեական ոստիկանության գլխավոր վարչության Արմավիրի մարզային վարչության պետն էր․ պաշտոնից ազատվել էր Փարաքարի համայնքապետ Վալոդյա Գրիգորյանի և ոստիկանության քրեական հետախուզության գլխավոր վարչության օպերլիազոր Կարեն Աբրահամյանի սպանությունից երկու օր անց։ Բայց ուշագրավ է, որ այս պաշտոնանկությունից կարճ ժամանակ անց Բդոյանը նշանակվել էր ՀՈԳՎ օպերատիվ-վերլուծական վարչության պետի տեղակալ։
«Իրավապահ մարմիններում ընդունված, այսպես ասած, կարգապահական՝ գրված կամ չգրված կարգապահական սանկցիաներից մեկը պաշտոնի նվազեցումն է»,- ասում է Ոստիկանության բարեփոխումները համակարգող խորհրդի անդամ Դանիել Իոաննիսյանը։
Որքանո՞վ այս պաշտոնանկությոունները կապ ունեն վերջին շրջանում տեղի ունեցած աղմկոտ սպանությունների և նախորդ շաբաթվա ազատումների հետ։
«Ես չեմ բացառում, որ այս ծառայությունների նոր ղեկավարները որոշել են, որ այս կադրերը չեն համապատասխանում իրենց ակնկալիքներին և առաջարկել են այդ կադրերին փոխել»,- կարծիք է հայտնում Իոաննիսյանը։
Նա դրական է համարում պարեկային ծառայության Երևան քաղաքի գնդի հրամանատար Անդրանիկ Իսախանյանի պատշտոնանկությունը։ Ըստ հրապարակումների՝ Իսախանյանը 2024-ի մայիսի 31-ին ԱԳՆ շենքի մոտ բախումների ժամանակ պատռել էր ակցիայի մասնակիցների հագուստները։
Առանց պարզաբանումների պաշտոնանկությունները, կարծես, սովորական են դարձել․ վերջերս վարչապետի որոշումներով՝ պաշտոններով փոխվել էին Արամ Ղազարյանն ու Կամո Ցուցուլյանը։ Հունվարի 19-ին Կամո Ցուցուլյանը նշանակվել էր Ոստիկանության պետ, իսկ Արամ Ղազարյանը՝ ՆԳՆ փրկարար ծառայության տնօրեն։ ՆԳ նախարարն իր ասուլիսի ժամանակ միայն ասել էր, որ դա հերթական կադրային փոփոխությունն է։ Սարգսյանի հրամանով երեկ ազատվել են նաև նախարարության ֆինանսաբյուջետային ու տնտեսական վարչությունների պետերը։
Մանրամասները՝ տեսանյութում։
Արփի Հակոբյան
