Մերձավոր Արևելքից դեպի ՀՀ և այլ ուղղություններով նոր չվերթներ են չեղարկվել 

Մերձավոր Արևելքի երկրներից դեպի Հայաստան չվերթները կրկին չեղարկվել են։ Այս մասին տեղեկանում ենք «Զվարթնոց» միջազգային օդանավակայանի առցանց չվացուցակից։ 

Չեղարկվել են Emirates և Flydubai ավիաընկերությունների Դուբայ-Երևան ուղղությամբ երեք չվերթ, Air Arabia-ի Շարժա-Երևան երթուղով՝ երկու չվերթ, Qatar airways-ի Դոհա ուղղությամբ մեկ չվերթ։ 

Վաղը նախատեսվող Դուբայ-Երևան և Շարժա-Երևան չվերթներն այս պահի դրությամբ, ըստ առցանց չվացուցակի, պետք է իրականացվեն։ 

Երևանի քաղաքապետարանի «Երևան» երիտասարդական նվագախումբ-համույթը, շուրջ  87 անձ, ժամանակից շուտ Լիբանանից Հայաստան է վերադարձել: Բեյրույթի չվերթը Երևանում վայէջք է կատարել այսօր ժամը 12:48-ին։  Նշվում է, որ «Middle East Airlines» ավիաընկերության հետ դեսպանության բանակցությունների արդյունքում որոշվել է հավելյալ, հատուկ այդ նպատակի համար չվերթ կազմակերպել։

ԱՄԷ-ում ՀՀ դեսպանությունն էլ հայտարարել է ԱՄԷ-ից Օման կայանալիք վերջին անվճար տեղափոխման մասին։ Այն քաղաքացիները, ովքեր արդեն ունեն և ձեռք կբերեն Fly One ընկերության կողմից մարտի 5-ին երեկոյան ժամը 21:00-ին կայանալիք Մասկատ-Երևան տոմսերը, կարող են օգտվել դրանից։ 

2026 թվականի մարտի 4-ի դրությամբ Մերձավոր Արևելքի օդային տարածքը ամբողջությամբ կամ մասնակիորեն շարունակում է փակ մնալ՝ պայմանավորված փետրվարի 28-ին Իրան, Իսրայել և ԱՄՆ սկսված ռազմական գործողություններով։ 

Իրանի, Իրաքի, Իսրայելի, Կատարի, Բահրեյնի և Քուվեյթի օդային տարածքները շարունակում են մնալ փակ․ ավիաընկերությունների կողմից հազարավոր չվերթներ չեղարկված են։ Այս պահին միայն ԱՄԷ-ն է մասնակիորեն բացել իր օդային տարածքը։ Խոշոր ավիաընկերությունները՝ Emirates-ը, flydubai-ը և Etihad Airways-ը, չեղարկել են կանոնավոր չվերթների մեծ մասը։ Մարտի 3-ին և 4-ին կատարվում են միայն խիստ սահմանափակ քանակով հատուկ և տարհանման չվերթներ: 

Անի Թամրազյան