Մայր Աթոռը և Բարենորոգման խորհուրդը արձագանքել են պատգամավորների նախագծին․ ՏԵՍԱՆՅՈՒԹ

ԱԺ-ում քննարկվում է «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» օրենքում փոփոխությունների հարցը։

Այն վերաբերում է կրոնական բնույթի հուշարձանների սեփականության իրավունքի փոփոխությանը, որի վերաբերյալ որոշակի սահմանափակումներ են առաջարկել պատգամավոր Թագուհի Ղազարյանը և Սիսակ Գաբրիելյանը։
Գործող կարգավորմամբ, եթե հուշարձան է օտարվում, անկախ հնությունից, արժեքից, բնույթից, սեփականության իրավունքի փոփոխության դեպքում պարտավոր է այդ մասին տեղեկացնել լիազոր մարմնին։

«Մեր առաջարկն էր, որպեսզի համաձայնեցնի, այսինքն՝ Կառավարությունը հնարավորություն ունենա մերժելու կամ թույլատրելու նման անհրաժեշտություն առաջանալու պարագայում»,-նշեց Ղազարյանը։

Պատգամավորը նշեց նաև, որ նախագծի վերաբերյալ արձագանք է ստացել ինչպես Մայր Աթոռից, այնպես էլ Նիկոլ Փաշինյանի ստեղծած Բարենորոգման խորհրդից․ «Խորհուրդն արձագանքել է և առաջարկել է ավելի խստացնել կարգավորումները, որպեսզի տնօրինման իրավունքը ևս սահմանափակվի, բայց Կառավարությունը նպատակահարմար չի գտել, որովհետև սահմանադրականության խնդիր է նկատել։ Եվ Մայր Աթոռը պաշտոնական հայտարարությամբ առաջարկել է, որպեսզի սահմանափակումը տարածվի բոլոր սուբյեկտների վրա և արգելվի ընդհանրապես, ոչ թե խստացվի։ Այսինքն՝ այդ նույն տրամաբանության մեջ, ինչ տրամաբանության մեջ Բարենորոգման խորհուրդը և Ազգային ժողովն ու Կառավարությունն են մտածում։

Նախ ուզում եմ ասել, որ մեր առաջարկած կարգավորումով արդեն իսկ տարածվում է բոլոր սուբյեկտների վրա, այսինքն՝ այդ թվում և համայնքի, այդ թվում և Կառավարության սեփականության իրավունքի փոփոխությունը չի կարող առանց այդ բոլոր փուլերը անցնելու կատարվել։ Հետևաբար, առաջին հատվածը Մայր Աթոռի պաշտոնական տեսակետի ինքնին գոյություն ունի։ Երկրորդի վերաբերյալ նույնպես որոշակի վերապահում ունի Կառավարությունը՝ սահմանադրականության հետ կապված հնարավոր սեփականության իրավունքի խախտումներ նկատվեն այստեղ։

Այսպիսով, հարգելի գործընկերներ, քանի որ այս թեման շատ է քննարկվել նաև համերաշխության տրամաբանության մեջ, ուզում եմ ասել, որ ըստ երևույթին հասել ենք մի նախագծի, որտեղ կարելի է ասել մի վերջնական արդյունքի, որտեղ կարելի է ասել՝ համերաշխվում է ընդդիմության առաջարկը և Կառավարության պատկերացումները, Մայր Աթոռի պաշտոնական տեսակետը և Բարենորոգման խորհրդի առաջարկը»։

Մանրամասները՝ տեսանյութում։