27.07.2026 | 23:18
Ոստիկանները ձերբակալել են ապօրինի զենք պահող տղամարդուն
Ցավակցություն՝ մեկ օր անց. ինչպես ՀՀ-ն պետք է արձագանքի Իրանում պատերազմին. ՏԵՍԱՆՅՈՒԹ
Քաղաքականություն
02.03.2026 | 21:09
Այսօր Նիկոլ Փաշինյանը ցավակցական հեռագիր է հղել Իրանի Իսլամական Հանրապետության նախագահ Մասուդ Փեզեշքիանին։ ԱՄՆ-ի և Իսրայելի համատեղ ռազմական գործողության մեկնարկից և Իրանի գերագույն հոգևոր առաջնորդ այաթոլլահ Ալի Խամենեիի սպանության մասին հայտնի դառնալուց ի վեր սա ՀՀ-ից վարչապետի մակարդակով առաջին արձագանքն էր:
«Ձերդ գերազանցություն, Մեծ անհանգստությամբ ենք հետևում Իրանի շուրջ տեղի ունեցող զարգացումներին։ Ընդունեք խնդրեմ իմ ցավակցությունները Իրանի Իսլամական Հանրապետության ղեկավարության և քաղաքացիների շրջանում գրանցված զոհերի կապակցությամբ։ Մշտապես կհիշենք Իսլամական հեղափոխության գերագույն առաջնորդ Ալի Խամենեիի անձնական դերը Հայաստան-Իրան հարաբերությունների զարգացման գործում»,- նշել է Փաշինյանը։
Մինչ հայտնի կդառնար ցավակցական հեռագրի մասին, խորհրդարանական ընդդիմության ներկայացուցիչն օրվա առաջին կեսին ուշադրություն էր հրավիրում այն հանգամանքի վրա, որ Փաշինյանը Հայաստանի հարևանությամբ ընթացող պատերազմի ֆոնին հանգստյան օրերին թիմակիցների հետ ներկուսակցական քարոզարշավով էր զբաղված։
Փաշինյանը երեկ ներկուսակցական քարոզարշավի ընթացքում հեգնում էր այս թեմայով իրեն քննադատողներին։
Փաշինյանի հեռագրին այսօր հաջորդեց երկու երկրների ԱԳ նախարարների հեռախոսազրույցը։ Մարդասիրական բնույթի հարցեր են քննարկվել՝ Միրզոյան-Արաղչի զրույցի վերաբերյալ հայտնեց ԱԳՆ-ն։
Հայաստանի համար ի՞նչ ռիսկեր կարող է առաջանցել ԱՄՆ-ի և Իսրայելի լայնածավալ հարձակումը հարևան Իրանի վրա։ Երեկ ԱԽ նիստ է գումարվել, Արտաքին հետախուզության ծառայության պետ Քրիստիննե Գրիգորյանը հանդես է Մերձավոր Արևելքում տեղի ունեցող իրադարձությունների մասին զեկույցով։ Չնայած դրան՝ ընդդիմադիրները պնդում են՝ Կառավարության գործողությունների պլանն անհայտ է։
ՆԳ նախարարի՝ միգրացիոն ոլորտը համակարգող տեղակալ Արմեն Ղազարյանն այսօր Factor TV-ի հարցին ի պատասխան՝ նշեց՝ հայ-իրանական սահմանին արձանագրվող տեղաշարժում արտառոց դրսևորումներ չկան։ Իսկ ի՞նչ է ձեռնարկվելու, եթե տասնյակ հազարավոր իրանցիներ որոշեն Հայաստան գալ։ Պաշտոնյան անորոշ պատասխան տվեց․ «Ցանկացած նման իրավիճակի համար անհրաժեշտ ինֆորմացիան կհրապարակվի»։
Հայաստանի հարևանությամբ պայթող հրթիռներն արդյո՞ք անվտանգային ուղիղ ռիսկեր չեն ստեղծում․ պաշտպանության նախարարի տեղակալ Արման Սարգսյանը վարչապետի հայտնի միտքն է կրկնում․ «Պատկան մարմինները, բնականաբար, անհրաժեշտ աշխատանքներ իրականացնում են, ՀՀ-ում խաղաղություն է»։
Մինչ ընդդիմությունն իշխանություններից պահանջում է Իրանի վրա հարձակման հարցում հստակ դիրքորոշում հայտնել, իշխանությունը հակադարձում է՝ ընդդիմադիրների սրտով չէ, որ երկրում խաղաղություն է։
Մինչ Հայաստանի խորհրդարանական ուժերի բանավեճում կրքերը ճաշացանկի շուրջ են, պատերազմական գոտում իրավիճակը չի հանդարտվում։ Թրամփը հայտարարել է՝ Իրանի դեմ ռազմական գործողությունները կարող են տևել չորս շաբաթ և շարունակվել այնքան, քանի դեռ իրենց բոլոր նպատակներին չեն հասել:
Մանրամասները՝ տեսանյութում։
Նարեկ Կիրակոսյան
