27.10.2026 | 20:41
Զելենսկին մանրամասներ է հայտնել Նորվեգիայի և Ֆինլանդիայի առաջնորդների՝ Պուտինի հետ ունեցած զրույցի վերաբերյալ
Թեհրանն ու Բաքուն համապարփակ համագործակցության փաստաթուղթ են ստորագրել
Քաղաքականություն
24.02.2026 | 14:44
Իրանը և Ադրբեջանը Բաքվում կայացած 17-րդ համատեղ տնտեսական հանձնաժողովի նիստում ստորագրել են համապարփակ համագործակցության փաստաթուղթ, որը ուրվագծում է համագործակցությունը 10 հիմնական ոլորտներում, այդ թվում՝ տրանսպորտի, էներգետիկայի, էլեկտրաէներգիայի, ջրային ռեսուրսների, տնտեսական, մշակութային և սոցիալական, գրում է իրանական Mehr-ը։
Հուշագիրը ստորագրել են Իրանի ճանապարհների և քաղաքաշինության նախարար Ֆարզանե Սադեղը և Ադրբեջանի փոխվարչապետ Շահին Մուստաֆաևը:
Տրանսպորտի ոլորտում երկու կողմերը քննարկել և համաձայնության են եկել տրանսպորտի, սահմանային կառավարման և երկաթուղային կապերի ընդլայնման վերաբերյալ։
Էներգետիկայի ոլորտում հաստատվել է առաջին և երկրորդ նավթային բլոկների շուրջ համագործակցությունը, ինչպես նաև համատեղ աշխատանքային խմբի ստեղծումը: Էլեկտրաէներգիայի ոլորտում կողմերը համաձայնության են եկել Իրանի, Ադրբեջանի և Ռուսաստանի էլեկտրացանցերի միացման, ինչպես նաև ադրբեջանական էլեկտրաէներգիայի Իրան արտահանման վերաբերյալ։
Ենթակառուցվածքներից և էներգետիկայից զատ, երկու երկրները համաձայնության են եկել նաև այլ ոլորտներում, այդ թվում՝ սպորտի և երիտասարդության, մշակութային և սոցիալական համագործակցության, զբոսաշրջության, գյուղատնտեսության, մաքսային ծառայության, արդյունաբերության և ներդրումների ոլորտներում։
Թարգմանությունը՝ Էմմա Չոբանյանի
