Այս նախագիծը որևէ խնդիր չի լուծում Հայ առաքելական եկեղեցու ժառանգության հատվածում․ Գալստյան․ ՏԵՍԱՆՅՈՒԹ

«Սա մտացածին, հող չունեցող նախաձեռնություն է, և որևէ խնդիր չի լուծում գոնե Հայ Առաքելական եկեղեցու ժառանգության հատվածով»,- ԱԺ Գիտության, կրթության, մշակույթի, սփյուռքի, երիտասարդության և սպորտի հարցերի հանձնաժողովի նիստում ասաց ՀՀ ԱԺ «Հայաստան» խմբակցության պատգամավոր Լիլիթ Գալստյանը՝ անդրադառնալով «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» օրենքում փոփոխություն կատարելու մասին օրենքի նախագծին։

«Խոսքը հուշարձանների պետական ցուցակներում ներառված կրոնական կառույցների՝ վանական համալիրների կամ պաշտամունքային կառույցների մասին է, բայց ոչ սովորական պաշտամունքային կառույցների, այլ պետական ցանկերում ներառված, ինչը մի ուրիշ կարգավիճակ է հաղորդում այս կառույցներին։ Մեկ այլ կարգավիճակ, որը նշանակում է համազգային սեփականություն և համազգային ժառանգություն, ընդ որում՝ ոչ այս պահի դրությամբ։ Տեսակետներ հնչեցին նաև Մայր Աթոռը ներկայացնող տարբեր հոգևորականներից, որ իրենք ընդհանրապես դեմ են այս կառույցների՝ պաշտամունքային կառույցների, եկեղեցիների, վանքերի, վանական համալիրների որևէ կերպ օտարմանը»,- ասաց ընդդիմադիր պատգամավորը։

Գալստյանն ընդգծեց, որ մինչ այժմ նախադեպ չի եղել, երբ պետական ցուցակներում ընդգրկված որևէ պաշտամունքային կառույց օտարվել է։ Քննարկման ընթացքում հարց հնչեց նաև՝ արդյոք հոգևորականների դիրքորոշումը վերաբերում է հենց նախագծին, թե ընդհանրապես օտարման գաղափարին։ Ի պատասխան՝ Գալստյանը նշեց, որ պետական ցուցակներում ընդգրկված պաշտամունքային կառույցների օտարումը պետք է բացառվի։

Մանրամասները՝ տեսանյութում։