09.09.2026 | 23:17
Ինչ են քննարկել Փաշինյանը և Մակրոնը. Կառավարությունը մանրամասներ է ներկայացրել
«Ինտերի» ներկայացուցիչները կհանդիպեն Մխիթարյանի գործակալի հետ
23.02.2026 | 17:36
Իտալական «Ինտերը» ծրագրում է մարտին հանդիպել Հայաստանի ազգային հավաքականի նախկին ավագ Հենրիխ Մխիթարյանի գործակալ Ռաֆայելա Պիմենտայի հետ և քննարկել նոր պայմանագիր կնքելու հարցը, հաղորդում է FcInterNews.it-ը։
Միլանյան ակումբը մտադիր է մեկ տարով երկարաձգել 37-ամյա կիսապաշտպանի գործող պայմանագիրը, որն ավարտվում է այս մրցաշրջանի վերջում։ Նոր առաջարկը նախատեսում է աշխատավարձի շուրջ 20 տոկոս նվազեցում և թիմում դերի փոփոխություն։ «Ինտերում» մնալու դեպքում Մխիթարյանը կարող է ռոտացիայի խաղացող լինել հաջորդ մրցաշրջանում։
Հայաստանի հավաքականի պատմության լավագույն ռմբարկուն 2022 թվականից է խաղում «Ինտերում», որի կազմում դարձել է Իտալիայի չեմպիոն, գավաթակիր, սուպերգավաթակիր ու երկու անգամ խաղացել է Չեմպիոնների լիգայի եզրափակիչում։ Ընթացիկ մրցաշրջանում կիսապաշտպանը մասնակցել է 24 հանդիպման, դարձել 2 գոլի ու 2 գոլային փոխանցման հեղինակ։ Կարիերայի ընթացքում Հենրիխ Մխիթարյանը հանդես է եկել նաև Երևանի «Փյունիկում» (2006-2009 թթ.), Դոնեցկի «Մետալուրգում» (2009-2010 թթ.) ու «Շախտյորում» (2010-2013 թթ.), Դորտմունդի «Բորուսիայում» (2013-2016 թթ.), անգլիական «Մանչեսթեր Յունայթեդում» (2016-2018 թթ.) ու «Արսենալում» (2018-2019 թթ.), իտալական «Ռոմայում» (2019-2022 թթ.)։
