19.05.2026 | 23:56
Հայաստանի մի շարք հասցեներում էլեկտրաէներգիայի անջատումներ կլինեն
Ալիևը Իրանի նախարարի հետ քննարկել է Հյուսիս-Հարավ տրանսպորտային միջանցքը, Արաքսի վրա կամրջի կառուցումը
Քաղաքականություն
23.02.2026 | 16:17
Ադրբեջանի նախագահ Իլհամ Ալիևն ընդունել է Իրանի ճանապարհների և քաղաքաշինության նախարար, ադրբեջանա-իրանական միջկառավարական տնտեսական համագործակցության համատեղ հանձնաժողովի համանախագահ Ֆարզանե Սադեղի գլխավորած պատվիրակությանը։
Ադրբեջանական կողմի հաղորդմամբ՝ զրույցի ընթացքում գոհունակությամբ նշվել է Ֆարզանե Սադեղի՝ անցյալ տարի Ադրբեջան կատարած այցը և նրա հանդիպումը նախագահ Իլհամ Ալիևի հետ: Հիշելով Իրանի նախագահ Մասուդ Փեզեշքիանի հետ վերջերս ունեցած հեռախոսազրույցը՝ Իլհամ Ալիևը նշել է, որ զրույցի ընթացքում քննարկվել է Ադրբեջանի և Իրանի՝ որպես բարեկամ երկրների միջև համագործակցությունը:
Գոհունակությամբ նշելով երկկողմ օրակարգի ընդլայնումը, Ալիևն ընդգծել է, որ համատեղ իրականացվող նախագծերը լայն հնարավորություններ կբացեն ինչպես Ադրբեջանի, այնպես էլ Իրանի, ինչպես նաև՝ տարածաշրջանի համար: Նա հույս է հայտնել, որ այս բոլոր հարցերը կքննարկվեն Ֆարզանե Սադեղի Ադրբեջան այցի ընթացքում, և որ այցը դրական արդյունքներ կտա։
Ֆարզանե Սադեղը շնորհակալություն է հայտնել ընդունելության համար։ Նա փոխանցել է Իրանի նախագահ Մասուդ Փեզեշքիանի ողջույնները՝ ընդգծելով, որ Իրանի նախագահը հատուկ նշանակություն է տալիս Ադրբեջանի հետ հարաբերություններին։
Զրույցի ընթացքում անդրադարձ է կատարվել Բաքվում կայանալիք Ադրբեջանի և Իրանի Իսլամական Հանրապետության միջև տնտեսական, առևտրային և հումանիտար ոլորտներում համագործակցության պետական հանձնաժողովի 17-րդ նիստի կարևորությանը։ Քննարկվել են Հյուսիս-Հարավ տրանսպորտային միջանցքը, Աղբենդը և Քելալան միացնող Արաքս գետի վրայով ավտոմոբիլային կամրջի կառուցումը և փոխադարձ հետաքրքրություն ներկայացնող այլ հարցեր։
Թարգմանությունը՝ Էմմա Չոբանյանի
