Նորվեգացի դահուկավազորդ Յոհանես Կլեբոն դարձավ պատմության մեջ առաջին մարզիկը, որը 6 ոսկե մեդալ է նվաճում մեկ ձմեռային Օլիմպիական խաղերում։
Իտալական Միլանում և Կորտինա դ’Ամպեցոյում ավարտին մոտեցող 25-րդ ձմեռային Օլիմպիական խաղերի նախավերջին օրը 29-ամյա Կլեբոն նվաճեց նաև դասական ոճով մարաթոնի (50 կմ) չեմպիոնի կոչումը։ Երկրորդ և երրորդ տեղերը գրավեցին նրա հայրենակիցներ Մարտին Լյովստրյոմ Նյուենգետը և Էմիլ Իվերսենը։
Յոհանես Կլեբոն դարձավ 11-ակի օլիմպիական չեմպիոն՝ թարմացնելով սեփական ռեկորդը։ Ձմեռային Օլիմպիական խաղերում տիտղոսների քանակով նրան հաջորդում են նորվեգացի բիատլոնիստ Ուլե-Էյնար Բյորնդալենը, նորվեգացի դահուկավազորդներ Բյորն Դելին ու Մարիտ Բյորգենը, որոնք նվաճել են 8-ական ոսկե մեդալ։
Կլեբոն նաև երկրորդ ամենատիտղոսակիր օլիմպիականն է պատմության մեջ։ Օլիմպիական ոսկե մեդալների քանակով նորվեգացին զիջում է միայն ամերիկացի լեգենդար լողորդ Մայքլ Ֆելպսին, որը Օլիպիական խաղերի 23-ակի չեմպիոն է։
