28.07.2026 | 09:45
Վթարային ջրանջատում Լոռու մարզում
«Նոայի» նախագահ․ Դուք մոտիվացրիք ինձ ավելի շատ ներդրում անել հայկական ֆուտբոլում
20.02.2026 | 11:26
Ֆուտբոլի Հայաստանի չեմպիոն «Նոայի» նախագահ Վարդգես Վարդանյանը Կոնֆերենցիաների լիգայի անցումային փլեյ-օֆֆի առաջին խաղում նիդերլանդական «ԱԶ Ալկմարի» նկատմամբ նվազագույն հաշվով հաղթանակից հետո գրառում է արել ֆեյսբուքյան էջում։
«Այսօր դու՛ք եք հաղթել, հայեր ջան,
Դու՛ք եք հավատացել: Ձմռանը՝ շատ ուշ ժամի, մարզադաշտը լեփ-լեցուն էր: Տղաները պարզապես իրագործեցին ձեր հավատը: Դուք մոտիվացրեցիք ինձ ավելի շատ ներդրում անել հայկական ֆուտբոլում, մեր թիմին՝ ավելի շատ աշխատել: «Նոայի» հաղթանակը ավելացրեց Հայաստանին +0.500 միավոր, և մենք հիմա 33-րդ տեղում ենք: Այս հորիզոնականը պահպանելու դեպքում Հայաստանի գավաթակիրն առաջին անգամ կսկսի ճանապարհը Եվրոպա լիգայից:
Շնորհակալ եմ յուրաքանչյուրիդ: Միասին դեռ շատ ենք այսպիսի օրեր վայելելու, որովհետև դուք եք այդպես ուզում ու հավատում մեզ»,- նշված է գրառման մեջ։
«Նոան» առաջին հայկական ակումբն է, որը խաղաց եվրագավաթների փլեյ-օֆֆում։ «ԱԶ Ալկմարի» դեմ պատասխան հանդիպումը կկայանա փետրվարի 26-ին Նիդերլանդներում։ Դիմակայության հաղթողը 1/8 եզրափակիչում մրցելու է կամ Աթենքի ԱԵԿ-ի (Հունաստան), կամ Պրահայի «Սպարտայի» (Չեխիա) հետ։
