Թալանչի պետական հանցագործները, դրսից գործուղված օլիգարխը ընդդիմություն չեն․ իշխանության մեղքն է՝ այդ մարդիկ իրենց տեղում չեն․ Հովսեփ Խուրշուդյան․ ՏԵՍԱՆՅՈՒԹ

«Ազատ քաղաքացի» ՀԿ-ի ղեկավար Հովսեփ Խուրշուդյանի համոզմամբ, առաջիկա խորհրդարանական ընտրությունները լինելու են անկյունաքարային Հայաստանի ապագայի համար։ Factor TV-ի հետ զրույցում նա նշել է, որ իրական ընդդիմություն դեռ տեսանելի չէ, իսկ նախկին իշխանությունների ներկայացուցիչներին ընդդիմություն համարելը սխալ է։

Անդրադառնալով ներկայիս իշխանության և Ռոբերտ Քոչարյանի, Գագիկ Ծառուկյանի, Սամվել Կարապետյանի շուրջ համախմբված ուժերի միջև բանավեճին՝ Խուրշուդյանը կտրուկ է արտահայտվում՝ նրանց քաղաքական դերակատար չհամարելով։ «Ես հույսով սպասում եմ, որ գոնե առաջիկա մեկ-մեկուկես ամսվա ընթացքում Հայաստանում, իրոք, տեսանելի կդառնա ընդդիմությունը։ Ոչ թե այն քրեաօլիգարխիկ շրջանակները, որոնց Դուք թվարկեցիք, որովհետև ես միշտ ասել եմ՝ դրան ընդդիմություն, այսինքն՝ քաղաքական դերակատար չի կարելի համարել։ Ասենք՝ թալանչիների, ուզուրպատորների, պետական հանցագործների խմբերը չի կարելի ընդդիմություն համարել Հայաստանում»,- ասել է նա։

Խուրշուդյանի պատկերացմամբ՝ նախկին ուժերի ակտիվացման հարցում մեղքի իր բաժինն ունի գործող իշխանությունը, որը ժամանակին իրավական գնահատականներ չի տվել նրանց գործունեությանը։ «Գործող իշխանության պատասխանատվությունն ու մեղքն է, որ այդ մարդիկ իրենց տեղերում չեն հիմա, այլ եկել են քաղաքականությամբ են զբաղվում»,- նշել է նա՝ հավելելով, որ այս իրավիճակը կարող է հանգեցնել վտանգավոր սցենարի։ «Եթե առաջիկա մեկ-երկու ամսում իմ ասած քաղաքական ուժերը չձևավորեն ինչ-որ համախմբումներ, որոնք իրոք այլընտրանք հանդես կգան հասարակության համար, մենք էլի գալու ենք սև-սպիտակ տարբերակին, որն այս դեպքում շատ ավելի ռիսկային վիճակի կհանգեցնի մեր երկիրը»։

Խուրշուդյանը ներքաղաքական զարգացումները դիտարկում է նաև աշխարհաքաղաքական համատեքստում՝ ընդգծելով արևմտյան երկրների դերը Հայաստանի անվտանգության ապահովման գործում։ Նրա կարծիքով՝ Ռուսաստանի արձագանքը Հայաստանի երկաթուղու և ատոմակայանի թեմաներին ցույց է տալիս, որ Մոսկվան փորձում է խոչընդոտել Հայաստանի անկախ քայլերին՝ պահպանելով իր ազդեցության լծակները։ Վերլուծաբանը համոզված է, որ հունիսի 7-ի ընտրությունները լինելու են վճռորոշ։ Նրա գնահատմամբ՝ այդ օրը որոշվելու է Հայաստանի ինքնիշխանության ճակատագիրը։

«Այդ օրն է որոշվելու՝ Հայաստանը որպես հզոր, անկախ պետություն ունենալու ենք, թե՞ հանձնելու ենք վերջնականապես Ռուսաստանի քմահաճույքին, որ արդեն ինքն անկախ մեր կամքից՝ ոնց ուզենա, այդպես էլ տնօրինի իր մարիոնետների միջոցով թե՛ մեր տարածքները, թե՛ մեր շահերը, ամեն ինչ»,- եզրափակում է Հովսեփ Խուրշուդյանը։

Հարցազրույցն ամբողջությամբ՝ տեսանյութում։

Ռոբերտ Անանյան