«Ռեալն» ՈՒԵՖԱ-ին ապացույցներ է ներկայացրել ՉԼ-ի խաղում Վինիսիուսի նկատմամբ ռասիզմի դրսևորումների հարցով

Մադրիդի «Ռեալն» ՈՒԵՖԱ-ին ապացույցներ է ներկայացրել Լիսաբոնի «Բենֆիկայի» դեմ Չեմպիոնների լիգայի անցումային փլեյ-օֆֆի առաջին խաղում բրազիլացի հարձակվող Վինիսիուս Ժունիորի նկատմամբ ռասիզմի դրսևորումների առնչությամբ։ Պորտուգալիայում կայացած խաղի միակ գոլը խփելուց հետո Վինիսիուսը մրցավարին հայտնել էր, որ «Բենֆիկայի» արգենտինացի ֆուտբոլիստ Ջանլուկա Պրեստիանին ռասիստական բնույթի վիրավորանքներ է հնչեցրել իր հասցեին։ Հակառասիստական ​​արձանագրության համաձայն՝ խաղը դադարեցվել էր 10 րոպեով։

«Ռեալը» հանդես է եկել հայտարարությամբ՝ նշելով, որ ապացույցներ է ներկայացրել ՈՒԵՖԱ-ին։

««Ռեալն» այսօր ՈՒԵՖԱ-ին է տրամադրել բոլոր առկա ապացույցները, որոնք վերաբերում են երեքշաբթի՝ փետրվարի 17-ին, Լիսաբոնում «Բենֆիկայի» դեմ Չեմպիոնների լիգայի խաղի ժամանակ տեղի ունեցած միջադեպերին։ Մեր ակումբն ակտիվորեն համագործակցել է ՈՒԵՖԱ-ի կողմից խաղի ընթացքում տեղի ունեցած անընդունելի ռասիզմի դրսևորումներից հետո սկսված հետաքննությանը։

«Ռեալ Մադրիդը» շնորհակալություն է հայտնում մեր խաղացող Վինիսիուս Ժունիորի հասցեին համաշխարհային ֆուտբոլային հանրության կողմից ստացած միաձայն աջակցության, օգնության և սիրո համար։ «Ռեալ Մադրիդը» կշարունակի համագործակցել բոլոր հաստատությունների հետ՝ սպորտում և հասարակությունում ռասիզմը, բռնությունը և ատելությունը վերացնելու համար»,- ասվում է ակումբի հայտարարության մեջ։

Marca-ն գրում է, որ Ջանլուկա Պրեստիանին կապիկ է անվանել Վինիսիուսին։ Բացի այդ, «Էշտադիու դա Լուշ» ստադիոնի տրիբունաներից ռասիստական բնույթի արտահայտություններ են հնչել «Ռեալի» ֆուտբոլիստների հասցեին։

Հիշեցնենք, որ «Բենֆիկան» գլխավորում է «Ռեալի» նախկին գլխավոր մարզիչ Ժոզե Մոուրինյոն։