25.04.2026 | 11:33
Հռոմում կայացել է Հայոց ցեղասպանության 111-րդ տարելիցին նվիրված միջոցառում
Հաջիևը հայտարարել է, թե Ռուբեն Վարդանյանի դատավճիռը «ոչ միայն արդարադատության իրականացում է, այլև 30-ամյա հակամարտության ավարտ»
Քաղաքականություն
19.02.2026 | 15:10
«Բաքվի դատարանի որոշումը օլիգարխ Ռուբեն Վարդանյանի վերաբերյալ ոչ միայն արդարադատության իրականացում է, այլև գրեթե 30-ամյա հակամարտության խորհրդանշական և տրամաբանական ավարտը, որը հսկայական տառապանքներ բերեց ադրբեջանական ժողովրդին»,- X-ում գրել է Ադրբեջանի նախագահի օգնական Հիքմեթ Հաջիևը Ռուբեն Վարդանյանի և Արցախի այլ ապաշտոնյաների ապօրինի ու շինծու դատավարությունների վերաբերյալ, ըստ երևույթին, արձագանքելով միջազգային հանրության կողմից հայ գերիներին ազատելու անհրաժեշտության մասին հայտարարություններին։
«Հակամարտության ռազմաքաղաքական լուծման եզակի մոդել առաջ մղելով և հակամարտությունից հետո խաղաղության օրակարգ նախաձեռնելով՝ Ադրբեջանը նաև ապահովել է պատերազմական հանցագործությունների և մարդկության դեմ հանցագործությունների մեջ մեղադրվող անձանց, այդ թվում՝ Բակո Սահակյանի, Արայիկ Հարությունյանի, Ռուբեն Վարդանյանի և այլոց պատասխանատվությունը։ Խոջալուի ցեղասպանության հաջորդ տարելիցի նախօրեին այս դատական որոշումների հրապարակումը խորը հարգանքի տուրք է այդ ողբերգության և հակամարտության անմեղ զոհերի հիշատակին»,- գրել է Հաջիևը՝ ադրբեջանական կեղծ քարոզչական թեզերն առաջ տանելով։
Ըստ նրա՝ Բաքուն սպասում էր, որ «կստեղծվեն միջազգային դատարաններ կամ տրիբունալներ, ինչպիսին է Նյուրնբերգյան դատարանը, նախկին Հարավսլավիայի միջազգային քրեական տրիբունալը կամ Ռուանդայի միջազգային քրեական տրիբունալը»։
«Սակայն այսօրվա անարդար միջազգային միջավայրում նույնիսկ օրենքի կիրառումը դարձել է ավելի ու ավելի քաղաքականացված և ենթարկվում է կրկնակի ստանդարտների։ Հետևաբար, Ադրբեջանը կազմակերպել է բաց դատական գործընթացներ և ապահովել արդարադատություն իր սեփական իրավական համակարգի միջոցով՝ օրինակ ծառայելով միջազգային հանրությանը։ Սակայն բացարձակ անբարոյական և էթիկային դեմ է, որ որոշակի շրջանակներ, այդ թվում՝ Եվրախորհրդարանի որոշ անդամներ և այնպիսի կազմակերպություններ, ինչպիսին է Amnesty International-ը, կոչ են անում ազատ արձակել ծանր ռազմական հանցագործությունների մեջ մեղադրվող անձանց: Որտեղ կա հանցագործություն, պետք է լինի պատասխանատվություն, և արդարադատությունը լիովին ապահովված է։ Պատերազմական հանցագործությունների մեջ մեղադրվող անձի արդարացումը հավասարազոր է այդ հանցագործությունների օրինականացմանը և պատասխանատվության խաթարմանը մեղսակից դառնալուն։Կայուն խաղաղության և էթնիկ հաշտեցման հնարավոր չէ հասնել առանց արդարադատության»,- ասվում է Հաջիևի հայտարարության մեջ։
Նա նաև նշել է, թե Ադրբեջանը, իբր, շարունակելու է իր անսասան ջանքերը՝ տարածաշրջանային խաղաղության օրակարգն առաջ մղելու և ամրապնդելու համար։
Թարգմանությունը՝ Էմմա Չոբանյանի
