Ներխուժել են Անի Սամսոնյանի աշխատավայր. նախկին պատգամավորն ասում է՝ ինքնապաշտպանության է դիմել

Ազգային ժողովի նախկին պատգամավոր Անի Սամսոնյանը ֆեյսբուքյան գրառմամբ հայտնել է, որ իր աշխատավայր այսօր մի անձ է ներխուժել և ինքը դիմել է ինքնապաշտպանության։

«Հայաստանի իրավապահ համակարգի դեկորատիվ փայլն ու «օպերատիվ» պաշտպանությունը: Դեռևս հունվարին հաղորդում եմ ներկայացրել ՀՀ դատախազություն ինձ հետամտելու և խուլիգանության (այդ թվում քաղաքական բնույթով) համար: Ութ ամիս շարունակ համբերելուց հետո, երբ հասկացա, որ հետապնդումները վտանգավոր բնույթ են ստանում, որոշեցի որպես օրինապահ քաղաքացի չդիմել այլ միջոցների և պաշտպանություն փնտրել հայրենի իրավապահ համակարգում: Մինչև այսօր որևէ քայլ չի ձեռնարկվել, իսկ բանը հասավ նրան, որ այսօր տվյալ անձը ներխուժել է իմ աշխատավայր և ես ստիպված եմ եղել դիմել ինքնապաշտպանության: Գրեթե վստահ եմ, քաղաքական ստատուսի համար ինձ պատժելու դեպքում իրավապահ համակարգը մեկ րոպե չէր կորցնի: Հետո ասում եք` ինչի են մարդիկ դիմում ինքնադաստանի ու չեն վստահում իրավապահներին»,- ֆեյսբուքյան էջում գրել է քաղաքական գործիչը։

Factor TV-ն փորձեց որոշ մանրամասներ ճշտել Սամսոնյանից՝ ո՞վ էր ներխուժել, ի՞նչ ինքնապաշտպանության միջոցի է դիմել, սակայն նա նշեց, որ այս պահին այլ մեկնաբանություն չունի։

Ներքին գործերի նախարարությունից հայտնեցին, որ ներխուժման մասին այս պահին որևէ հաղորդում չեն ստացել։

Իսկ ինչ ընթացք է տրվել դեռևս հունվարին ներկայացրած հաղորդմանը, Գլխավոր դատախազությունից գրավոր հարցում խնդրեցին։

Ռոզա Վարդանյան