Ունեմ համոզմունք, որ գործընթացը գնալու է ՀԷՑ-ը պետության գերակա շահ ճանաչելու տարբերակով․ Դավիթ Ղազինյան

«Հայաստանի էլեկտրական ցանցեր» ՓԲԸ-ի նախկին գլխավոր տնօրենի պաշտոնակատար, «Ուժեղ Հայաստան» կուսակցության վարչության անդամ Դավիթ Ղազինյանը լրագրողների հետ զրույցում հայտնել է, թե ունի հստակ տեղեկատվություն, որ ՀԷՑ-ում վթարների քանակը մոտ 40 տոկոսով աճել է։

«Հիմա հայտարարվում է, որ չի աճել։ Գոնե վիզուալ բոլորս տեսնում ենք՝ ինչ է կատարվում, բայց ձեզ ամենայն պատասխանատվությամբ ասում եմ, բազմաթիվ անգամ ասել եմ՝ ՀԷՑ-ում երկիշխանություն է, և մենք, էս սկետչի պես ասած՝ «ամեն ինչ գիտենք»։ Էդ պարագայում չեն կարող ոչ մի տեղ փախնել, բայց ամեն դեպքում կեղծ են։ Հանձնաժողովն էլ, բնականաբար, որևիցե բանի վրա ուշադրություն չի դարձնի, որի արդյունքում կունենանք էս վիճակը՝ համատարած սուտ, ուղղակի խաբելու և վարկաբեկելու հետ կապված»,- ասաց Ղազինյանը։

Նրա գնահատմամբ՝ ընտրություններից հետո հոսանքի սակագինը թանկանալու է։
«Կուտակային կայանների մասին են խոսում։ Եթե այդ կուտակային կայանների համակարգը գործեց, մեր հաշվարկներով և մասնագետների հաշվարկներով՝ մոտավորապես կրկնակի թանկանալու են արևային կայանները։ Բայց այստեղ ևս իրենց ապիկարությունը չեն ուզում ընդունել, որ 8 տարվա մեջ Հայաստան-Իրան 400 կիլովոլտ գիծը ուղղակի չեն հասցրել ավարտին։ Այդ պարագայում մենք ավելցուկ չենք ունենալու»,- ասաց նա։

Լրագորղի հարցին, թե մինչև այս պահը ՀԷՑ-ի վաճառքի մասով արդյոք կառավարությունից ինչ-որ առաջարկ արվել է սեփականատիրոջը, Ղազինյանն արձագանքեց․

«Վեց ամիս է արդեն, ինչ հանցագործության մասին հաղորդում են տվել, դեռևս քրեական գործերից ոչ մի տեղեկություն չունենք։ Ես սենց բան չեմ տեսել, անկեղծ ասած, քաղաքական իշխանությունը հայտարարի՝ երեք միլիոն մարդու գրպան են մտել, հայտարարի՝ չարաշահումներ։ Բնականաբար, սեփականատերը (խմբ․ Սամվել Կարապետյան) հրաժարվելու է վաճառել, և ունեմ համոզմունք, որ գործընթացը գնալու է գերակա շահ ճանաչելու տարբերակով»,- ասաց Ղազինյանը։

Նա նշեց, որ ընկերությունը գերակա հանրային շահ ճանաչելու պարագայում սեփականատիրոջ համաձայնությունը չի պահանջվում։ Ղազինյանի կարծիքով՝ իշխանություններն ուզում են մի այնպիսի բան գտնել, որի արդյունքում կարողանան նվազեցնել ՀԷՑ-ի շուկայական արժեքը։

Նրա խոսքով՝ ՀԷՑ-ը մոտավորապես մեկ միլիարդ դոլարին մոտ արժեք ունի։

Անի Թամրազյան