Մարդիկ կան, որ հարցնում են՝ էրեխուն որտեղ մկրտենք․ էս Նիկոլի, թե՞ Գարեգինի եկեղեցին ա․ փորձագետ․ ՏԵՍԱՆՅՈՒԹ

«Իմ փորձից կասեմ՝ ինչ ահավոր կարող են լինել միջկրոնական կոնֆլիկտները կամ հակամարտությունները: Մենք շատ բախտավոր ենք ու շատ բախտավոր ենք եղել, որ Հայաստանում մինչև վերջերս նման բան չի եղել»,- այս մասին Ժողովրդավարական անվտանգության հայաստանյան երրորդ ամենամյա համաժողովի ժամանակ նշեց կրոնի կամ համոզմունքի հարցերով փորձագետ Իզաբելլա Սարգսյանը։

Նա աշխատել է Նիգերիայում, Բոսնիայում, Ուկրաինայում՝ այն վայրերում, որտեղ իրականում նման կոնֆլիկտները գոյություն ունեն:

«Ականատեսի աչքով կարող եմ ասել, որ դրանք սարսափելի կոնֆլիկտներ են: Որովհետև շատ հաճախ նույն էթնիկ մարդիկ են, նույն երկրից, նույն քաղաքից, նույն գյուղից, լրիվ նույն տեսքն ունեն, բայց շատ խորը համոզմունքներ ունեն երբեմն, որոնք կարող են հասնել անգամ ֆանատիզմի, և միջհամայնքային արյունալի կոնֆլիկտների կարող են դրանք հանգեցնել: Ինչու եմ սա ասում, որովհետև ես կարծում եմ, որ մենք՝ որպես հասարակություն, այո՛, գտնվում ենք տրավմայի մեջ, մենք չենք մարսել այն ամենը, ինչ մեզ հետ տեղի է ունեցել, այդ էջը չի շրջվել, և ոչ մի տեղ աշխարհում ոչ մի նման կոնֆլիկտից հետո արագ չի շրջվում: Բայց մենք պետք է հասկանանք, որ մեզ համար հասարակական համերաշխությունը չափազանց մեծ նշանակություն ունի էս իրավիճակից դուրս գալու համար»,-նշեց նա:

Իզաբելլա Սարգսյանի խոսքով՝ կրոնական թեմաներով կոնֆլիկտները բավականին արագ են զարգանում և նա չէր ցանկանա նման բան Հայաստանում տեսնել։

«Ես չգիտեմ ձեր բարեկամների մեջ մարդիկ կա՞ն արդեն, որ ձեզ հարցնում են՝ «երեխուն որտե՞ղ մկրտենք, էս Նիկոլի՞ եկեղեցին ա, թե՞ Գարեգինի եկեղեցին ա»: Այդդտեղից է սկսվում խորը անջրպետը: Կարծում եմ, որ բոլորս պետք է ջանք գործադրենք դրանից խուսափելու համար, որովհետև այդ անջրպետը կառուցելը հեշտ է, հետո այդ ամենն իրար բերելն է շատ դժվար»,- ընդգծեց փորձագետը։

Մանրամասները՝ տեսանյութում։