Երեխա ունեցող ընտանիքների բնակապահովման ծրագրի շրջանակում դիմումների ընդունման գործընթացը շարունակվում է

Աշխատանքի և սոցիալական հարցերի նախարարությունից մանրամասնում են, թե որ դեպքերում է երեխա ունեցող ընտանիքների բնակապահովության ծրագրի շրջանակում պետության կողմից միանվագ դրամական աջակցություն տրամադրվում։

«Երեխա ունեցող ընտանիքների բնակարանային ապահովության պետական աջակցության ծրագրի շրջանակում պետության կողմից միանվագ դրամական աջակցություն  է տրամադրվում երկու դեպքում՝

• մարզային բնակավայրերում բնակարան ձեռք բերելու կամ բնակելի տուն կառուցելու դեպքում,
• հիփոթեքային վարկ մարող ընտանիքում երեխա ծնվելու դեպքում։

Ծրագրի առաջին բաղադրիչից կարող եք օգտվել, եթե՝

• ունեք ՀՀ քաղաքացիություն,
• ունեք առնվազն 2 անչափահաս երեխա,
• հիփոթեքային վարկը տրամադրվել է 2024 թվականի հունվարի 1-ից հետո,
• տան արժեքը չի գերազանցում 35 մլն դրամը,
• ընտանիքը չունի այլ բնակելի անշարժ գույք։

Աջակցության չափը՝

• երկու երեխայի դեպքում մինչև 1 մլն դրամ է,
• երեք երեխայի դեպքում՝ մինչև 1,5 մլն դրամ,
• չորս և ավելի երեխաների դեպքում՝ մինչև 2 մլն դրամ։

Այս բաղադրիչից օգտվելու համար անհրաժեշտ է դիմել Աշխատանքի և սոցիալական հարցերի նախարարության հետ համագործակցող բանկերից որևէ մեկին՝

•  «Ակբա Բանկ»,
• «ԱՄԻՕ բանկ»,
• «ԱյԴի» Բանկ,
• «Կոնվերս Բանկ»,
• «Արարատբանկ»,
• «Արմսվիսբանկ»,
• «Բիբլոս Բանկ Արմենիա»,
• «Բլեսս» ՈՒՎԿ,
• «Գլոբալ Կրեդիտ»,
• «Էվոկաբանկ»,
• «Ինեկոբանկ»,
• «Կամուրջ» ՈՒՎԿ,
• «Հայէկոնոմբանկ»,
• «Նորման Կրեդիտ» ՈՒՎԿ,
• ՎՏԲ-Հայաստան Բանկ,
• «Ֆասթ բանկ» ։

Երկրորդ բաղադրիչի շրջանակում հիփոթեքային վարկ մարող ընտանիքում երեխա ծնվելու դեպքում՝ ընտանիքին տրվում է միանվագ դրամական աջակցություն, որն ուղղվում է հիփոթեքային վարկի մայր գումարի մարմանը։

Բաղադրիչից կարող եք օգտվել, եթե՝

• ունեք ՀՀ քաղաքացիություն,
• ունեք առնվազն 12 ամիս գործող հիփոթեքային վարկ, որի գծով ուշացումները չեն գերազանցում 30 օրը,
• տան արժեքը չի գերազանցում 35 մլն դրամը,
• ընտանիքը չունի այլ բնակելի անշարժ գույք։

Ծրագրում ընդգրկվելու համար անհրաժեշտ է դիմել մինչև երեխայի 1 տարին լրանալը։

Աջակցության չափը՝

• ընտանիքում առաջին կամ երկրորդ երեխայի ծննդով պայմանավորված կազմում է մինչև 500 հազար դրամ,
• երրորդ և հաջորդ երեխայի դեպքում՝ մինչև 2 մլն դրամ։

Երկու բաղադրիչի դեպքում, եթե քաղաքացին բնակելի անշարժ գույքը ձեռք է բերել կամ անհատական բնակելի տունը կառուցում է սահմանամերձ բնակավայրում կամ այն գյուղական բնակավայրում, որտեղ կառուցվում են դպրոցներ կամ մանկապարտեզներ, ապա աջակցության չափերն ավելանում են 50 տոկոսով։

Երկրորդ բաղադրիչից օգտվելու համար անհրաժեշտ է դիմել Ձեզ արդեն իսկ վարկ տրամադրած բանկ կամ վարկային կազմակերպություն»,- ասված է հաղորդագրությունում։