ՌԴ-ն ՀՀ-ի գործընկերն է, անընդհատ ասել, որ ռուսները եկան մեզ վնաս տալու, վնասակար խոսույթ է. Պապյան․ ՏԵՍԱՆՅՈՒԹ

«Հայաստանում տեսնում ենք արդեն ենթակառուցվածք, ենթակառուցվածք ասելով՝ սերվերներ, բոտեր, օգտահաշիվներ, որոնք ավելի վաղ դիտարկել են գործընկերները Մոլդովայում, որոնք ավելի վաղ դիտարկել են գործընկերները Ուկրաինայում»,- այս մասին Ժողովրդավարական անվտանգության հայաստանյան երրորդ ամենամյա համաժողովի ժամանակ նշեց տեղեկատվական անվտանգության հարցերով փորձագետ Արթուր Պապյանը։

«Եթե տեսնում ենք, որ նույն ենթակառուցվածքը այնտեղ էլ է լինում, Ուկրաինայում էլ էր լինում և մեզ մոտ էլ է լինում, անտրամաբանական է, որ մենք զուգահեռներ չտանենք, չփորձենք դրանից ինչ-որ դասեր քաղել: Մյուս կողմից նաև պարզ է, որ յուրաքանչյուր Մոլդովա իր համար Մոլդովա է, նկատի ունեմ Հայաստանը կտրուկ տարբերվում է և՛ սպառնալիքներով, և՛ դաշտով: Մեզ մոտ միշտ 90-ականների վերջերից ամենախոշոր սպառնալիքների վեկտորը եղել է Ադրբեջանը, այն աստիճան, որ հաճախ Ադրբեջանը նաև օգտագործել է ռուսաստանյան լրատվամիջոցները, ռուսաստանյան ինֆոհարթակները Հայաստանի վրա ինֆորմացիոն-տեղեկատվական գործողություններ իրականացնելու համար, և այսօր էլ դա ինչ-որ առումով իրականացվում է, մենք շարունակում ենք դա տեսնել»,- ասաց նա:

Պապյանի խոսքով՝ Մոլդովան Հայաստանից շեշտակիորեն տարբերվում է նրանով, Մոլդովայի մեծ թվով քաղաքացիներ նաև Ռումինիայի քաղաքացի են։

«Այնտեղ շատ հստակ խնդիրներ կան Ռուսաստան-Ուկրաինա պատերազմի համատեքստում: Ռուսաստանը շատ մեծ շահեր ուներ Մոլդովայում միջամտություններ անելու։ Հայաստանում էլ, այդ մասին շատ խոսվում է, որ Եվրամիությունը հետաքրքրություն է դրսևորում, շահագրգռվածություն է դրսևորում և նույնիսկ բոլորը սկսել են իրար մեղադրել հիբրիդային ինչ-որ բաներ անելու մեջ: Սրա հետ կապված հստակ պիտի հասկանանք՝ ով է փորձում օգնել, ով է փորձում խանգարել:

Մյուս կողմից պիտի հասկանանք, որ Ռուսաստանը Հայաստանի ամենախոշոր գործընկերն է, տնտեսական ամենալավ պարտնյորն է, և անընդհատ խոսել, որ ռուսները վա՜յ եկան մեզ վնաս տալու, էդ միանշանակ չի, և դա վնասակար խոսույթ է»,-ընդգծեց Պապյանը։

Մանրամասները՝ տեսանյութում։